സഞ്ചാരിയുടെ വഴിക്കാഴ്ചകള്‍

ധ്വനി - എന്തിനെത്തി ?

2011-07-16T03:18:00.000-07:00

കണ്ണീര്‍ പുരണ്ട വാക്കുമുറികളെ തുന്നിച്ചേര്‍ക്കാന്‍ പോലുമാവാതെ തേങ്ങിയൊരു അസനിഗ്ദ്ധമാം ബാല്യമുണ്ടെനിക്ക്;
പറ്റുകടയിലെ മിട്ടായി ഭരണികളില്‍ എന്റെ സ്വപ്നങ്ങളുടെ ഫ്രെയിം എന്നുമുറങ്ങിയുണര്‍ന്നൊരു കാലം!
വാ കീറിയ ദൈവമെവിടോ എനിക്കായിട്ട ഇരയും തേടി നടനം തുടങ്ങവേ ,അക്കൌണ്ടില്‍ ബാക്കിയായ കൌമാര കുസൃതികളില്‍ എല്ലാരേയും പോലെ ഞാന്‍ എന്നിലെ പ്രണയിയെ ചങ്ങലയ്ക്കിട്ടു !
എന്നിട്ടെന്താവാന്‍?
വര്‍ഷപരീക്ഷയ്ക്ക് ഉറക്കം ശത്രുവായ പോലെ എന്നെ വേട്ടയാടി വാക്കുകള്‍;
പുണരാന്‍ കൊതിയെങ്കിലും പുലര്‍ച്ച പേടിച്ച ജാരനായി ഞാന്‍ ,ഇന്നും വാക്കിനപ്പുറത്തെ പുഴവക്കില്‍ ആരോ കെട്ടിയ ബ്ലോഗ്ഷേടുകളില്‍ , എന്റെ വിലാപങ്ങള്‍ വിഴുങ്ങും നൌക കാക്കുന്നു!
ഒരു തരത്തിലതുമൊരു പകല്‍ നോട്ടക്കാരന്‍ തന്നെ സുഹൃത്തേ !
അദൃശ്യവരം പോലാ മഷിതണ്ടിന്നും ഉണര്‍ന്നിരിക്കുന്നു;
അതെന്നെ എഴുതാന്‍ മോഹിപ്പിക്കുന്നു;
വല്ലാതെ!

ധ്വനി - വൈകി എത്തിയത് !

2011-07-16T03:16:00.000-07:00

ഞാന്‍ എന്റെ വഴികളോട് കലഹിച്ചു ഒറ്റയ്ക്ക് നടന്നു;
വഴിയുടെ കൂട്ടില്ലാതെ !
ഒടുവില്‍ ഞാന്‍ നടന്നു നടന്നു ഉണ്ടാക്കിയെടുക്കുന്നതും ആയിരക്കണക്കിന് വഴികളില്‍ ഒന്ന് മാത്രമെന്ന തിരിച്ചറിവില്‍
എന്റെ വഴിത്തണലില്‍ ഞാന്‍ ഉടമ്പടിപത്രം ഒപ്പിട്ടു;
അങ്ങനെയാണ് ഞാന്‍ എഴുതുകാരനായത്!
കള്ളന്‍ പവിത്രനാകാതെ പോയത് !

മൌനമാസം!

2011-07-16T03:14:00.000-07:00

വ്യാകരണക്കൂട്ടിലെ വടിവ് കാക്കാന്‍ കൊതിചൊടുവില്‍
വാക്ക് പോലും വക്കു പൊട്ടി വീണുടയുന്നിടത്താനെന്റെ ഭാവന!
ഞാന്‍ കൊതിക്കുന്നതൊന്നും
എഴുതി മാറുന്നത് മറ്റൊന്നുമാകുമ്പോള്‍
ചിന്തകള്‍ക്ക് അവധി കൊടുത്തീ ജന്മ-സായാഹ്നത്തിന്റെ
നരച്ച കമ്പിളി പുതച്ചു അരണ്ട വെളിച്ചത്തിലേയ്ക്കു
ഞാനീയിടെയായി പതിവ് യാത്രക്കാരനാകുന്നു!
എന്നെ അറിയുന്നവരാരുമില്ലാത്ത
തീവണ്ടി മുറിയില്‍ പുലരി കാക്കുന്നു;
ചിരി നഷ്ടപ്പെട്ട വരണ്ട ചുണ്ടുകള്‍ക്കിടയില്‍
എന്റെ വ്രണിത യൌവനം ധാര കോരി
മറന്നു തുടങ്ങിയ ലുത്തിനിയകള്‍ ചിക്കിയുണക്കുന്നു!

അനുഭവങ്ങളില്ലാതിവിടുരുവാകില്ലൊരു സാക്ഷിയും കഥയും
സൂക്ത വിന്യാസങ്ങളുമെന്നു ശപിച്ച ആദിമ കഥാകാരാ ,
വിങ്ങി പിച്ചി പറിച്ചോടുവിലെന്നെയും അല്‍പ-പ്രാണനാക്കുന്നീ
വൈകുന്ഡ ജ്യാമിതിയിലെന്തേ പിറന്നു വീഴാത്തൂ
ഒരിറ്റു വാക്കെന്നെ ഒന്ന് തണുപ്പിക്കാന്‍,
ഒന്നണച്ചു മുകരാനൊരു വാക്ക്!

നടവഴികളില്‍ ഒരു പാവാടക്കാരി

2011-04-20T06:44:00.000-07:00

എന്റെ ഓര്‍മ്മകൂട്ടില്‍ എന്നും തണുപ്പായി,
എന്റെ മരുഭൂമികളില്‍ പുതുമഴയായി,
എന്നിലെ പുല്ലു വളര്‍ന്നു മറഞ്ഞ നടവഴികളില്‍ ഒരു പാവാടക്കാരിയുണ്ടായിരുന്നു;
എനിക്ക് അവളെയും അവള്‍ക്ക് എന്നെയും ഏറെ ഇഷ്ടം !
മഷിതണ്ടിന്‍ കുളിരില്‍ ഞാന്‍ എന്നെ കളഞ്ഞു പോയ ബാല്യം

അവളെന്നില്‍ പുനര്‍ജനിപ്പിച്ചു;

എവിടോ വീണുടഞ്ഞൊരു കളികോപ്പിന്‍ ചിലമ്പല്‍ ;
തോറ്റു പോയൊരു പള്ളികൂടപരീക്ഷയുടെ വിങ്ങല്‍;
ചതിക്കപെട്ടു പിന്നിലാക്കപെട്ട ഒരു കിളിതട്ടിലെ കണ്ണീര്‍;
കൊതി പറഞ്ഞു പറഞ്ഞു അടി വാങ്ങിയ ഒരു ബേക്കറി പലഹാരത്തിന്‍ മധുരം;
പിന്നെ,
ഒരു രാവിന്റെ നീളത്തില്‍ എന്നെ മറന്നു പോയൊരു അച്ചന്റെ മണം;
ഇതൊക്കെ ഇന്ന് യൌവനഹര്‍മ്യത്തിലെ നേരമ്പോക്കുകള്‍
എന്ന് ചിരിച്ചു തള്ളുംപോളും നീറ്റല്‍ അകലാതെ അവള്‍!

വാഴ്ത്തിപാടും ജനതയെ ,
വിഴുപ്പലക്കി മടക്കി എന്നും ചിരിച്ചു മാത്രം കാട്ടുന്ന സമൂഹമേ,
പിഴയൊടുക്കി പാപം മാത്രം വിളമ്പുന്ന അയല്‍ക്കാരെ,
ഒന്ന് തിരിച്ചു തരാമോ നിങ്ങള്‍ക്കവളെ ?
എന്നില്‍ നിന്ന് നിങ്ങള്‍ക്കായി പറിച്ചെടുത്ത
എന്റെ ബാല്യത്തെ?

എനിക്കൊന്നു ചിരിക്കാനാ...
ഒരു തവണഎങ്കിലും
എനിക്കായി മാത്രം ഒന്ന് ചിരിക്കാന്‍!

ഒരു തുള്ളി-ഒരു ജീവിതം

2011-01-20T02:47:00.000-08:00

നിഴല് പോലീ ജീവിതം

അതിലൊഴുകുവാന്‍ അഭയാര്‍ഥി നാം.

ചടുലമാമീ വഴികളില്‍

വിരല്‍ മീട്ടുവാന്‍ മൃതഗായകര്‍.

ഇനിയുമീ വിട വൈകവേ

വെറുതെ ആടുന്നിതോ നാടകം

ശതഭാവങ്ങളില്‍ !

അനശ്വരരല്ലിവര്‍ അല്പര്‍ തൃണഗാത്ര-

കേവല മര്‍ത്ത്യവിദുഷികര്‍ ,

ഊറ്റമെറ്റുമി പ്രവാസികള്‍ .

ഞാനുമൊഴുകുന്നു,

നീയുമൊഴുകുന്നു,

ധരണിയില്‍ ദിനമടരുന്നു മുറകളില്‍ .

ധരിത്രി, ഗഗനം, വാനചാരികള്‍

ആരുമാര്‍ക്കും അളവുകോല്‍ നീട്ടുന്നില.

എന്തിനെന്നിട്ടും

പുറം വടിച്ചു അകം പുകഞ്ഞു പോം

വെങ്കലപാത്രങ്ങലായ് നാമീ

വഴി , ഒരേ വഴി

വെവ്വേറെ തനിയെ നടന്നു തീര്‍പ്പു?

എന്റെ ജനാലചിന്തകള്‍

2011-01-17T13:05:00.000-08:00

ഇന്നലെ വരെ തൊട്ടിരുന്ന പഴയ മുഖങ്ങള്‍

എവിടെ പോയി മറഞ്ഞു എന്നറിയില്ല.

എന്റെ സമയങ്ങളില്‍ ഞാന്‍ സൌകര്യപുര്‍വ്വം എറിഞ്ഞുകളഞ്ഞ

എത്രയോ ചിരികളില്‍ ഒന്ന് മാത്രമായി

ബന്ധങ്ങള്‍ കൊഴിഞ്ഞു പോയിരിക്കുന്നു..

ചിരിയമ്പു തൊടുത്തു ചിരിപ്പികാന്‍ ആരുമില്ലാത്ത,

ഒരു ജാലകവിരിക്കപ്പുറത്തെ ലോകമെന്ത് എന്ന് നോക്കാത്ത

ലണ്ടന്‍ നഗരജീവിതം .

ചില നേരം ഞങ്ങളില്‍ ചിലര്‍

ഞങ്ങള്‍ക്കിടയിലും അന്യരാവുന്നുവോ

എന്ന് തോന്നും!

എത്ര ചേര്‍ത്തു പിടിച്ചു ചിരിച്ചു കാണിച്ചാലും

ഇന്ന് എനിക്കാരെയും വിശ്വസിക്കാന്‍ തോന്നാറില്ല.

ഉള്ളു പറിഞ്ഞു കരയുന്നവനെയും

ഒന്ന് പുനര്‍ന്നൊരു മാത്ര നില്‍പ്പാനിന്നെനിക്കാവാരില്ല.

ചിമിഴിനുല്ല്ളിലെ ദീപനാളം പോലീ തിരക്കില്‍ ഞാനും

ചാഞ്ചാടി ഒഴുകുന്നു...

അങ്ങനെ മെല്ലെ മെല്ലെ..!

വെളിയില്‍ മഴ പെയ്തു തോരുമ്പോള്‍

വെറുതെയെന്‍ ജനാലയില്‍

ഓര്‍മ്മകുടം ചോര്‍ത്തിയൊരു പത്തു നിമിഷം!

അതിനുള്ളിലെന്നിലൊരു കടലിരന്ബുന്നതും,

തീരം നഷ്‌ടമായ കൊടിക്കുറ വിലാപങ്ങളുടെ

സങ്കീര്‍ത്തനത്തില്‍ മുങ്ങി മറഞ്ഞു പോവതും ,

കവിഹൃദയമൌനം വിഷാദച്ഛവി പടര്‍ന്നു മങ്ങുന്നതും ,

എന്നിലെ സഞ്ചാരി ലബരിന്തുകളില്‍ കൊന്തമണിയുരുട്ടി

തനിയെ യാത്രക്കൊരുങ്ങുന്നതും കാണ്മു ഞാന്‍ ..!

മിഴി പുട്ടുമ്പോള്‍ ഉതിര്ന്നൂ വീഴ്വതില്‍

"എന്റെ നാട്" എന്നൊരു പഴമനസ്സുരുകുവതും തോന്നല്‍ !

എനിക്കെന്നെ കളഞ്ഞു പോവാതിരിപ്പനൊന്നു

പൊതിഞ്ഞു പിടിക്കാന്‍ എന്റെ വീടിന്റെ

ചൂട് പോലും ഇന്ന് എന്റെ കൈപ്പിടിയിലില്ലല്ലോ..

നേട്ടങ്ങള്‍ക്കിടയിലീ മനോഹര സന്ധ്യായാത്രകളില്‍

ലണ്ടന്‍കാരന്റെ പൌണ്ട് ചിരിയില്‍ ,

മഞ്ഞു നേര്‍ത്തുപെയുമോരോ സായന്തനങ്ങളിലും

ഞാനെന്നെ ഒളിച്ചു പിടിക്കുന്നു ..

ആരാനും കണ്ടാലോ

മുറിച്ചെന്നെ എന്നില്‍ നിന്നുര്‍ത്തിയെരിഞ്ഞാലോ ?

ഞാന്‍ ഞാനല്ലാതെ ഒരു മാത്ര..

അതിലും നന്ന് മിഴി പൂട്ടിയൊരു ചിരിയാണ്!

എല്ലാ യാത്രകളും ഒരു ചിരിയാക്കിയതാണല്ലോ

ഈ സഞ്ചാരി!

അതിനാവുമോ ഞാന്‍ ഇപ്പോളും ഒരുങ്ങി തീരാത്തത് ?

ചോറുരുളകള്‍

2010-10-11T10:42:00.000-07:00

നിലവിളികള്‍ക്ക് ഒച്ച പോര എന്ന് തോന്നി ...

ആരുമറിയാതെ അവ ചത്തുപോവരുതെന്നു മനസ്സ് കെഞ്ചി!

അത് കൊണ്ട് എഴുതി വയ്കുന്നു ...

നിങ്ങളിലെ ചെവികള്‍ ചീഞ്ഞു പോവും മുന്‍പേ

അവയ്കുണ്ണാന്‍

നടന്നു തളര്‍ന്നു തുടങ്ങിയ ഒരു സഞ്ചാരി

ഇട്ടു വച്ച ചോറുരുളകള്‍!!

ഇന്നുകള്‍

2010-10-05T17:36:00.000-07:00

പാലും തേനും ഒഴുകുമീ ദേശ-

ത്തില്ല തെല്ലുമൊരു മധുരം;

തരം പോല്‍ തിരിപ്പാന്‍ ഇനി-

യൊട്ടുമില്ലെന്നിലും മധുരം;

താഴികക്കുടങ്ങള്‍ക്ക് താഴെ മഞ്ഞു പെയ്തു

വിറങ്ങലിക്കുമീ സന്ധ്യയിലിനി

മടങ്ങാമെന്ന് കൊതിക്കുവതു ഞാന്‍

പാവം സഞ്ചാരി ...

ഭാണ്ടക്കെട്ടിനു കനമേറി,

ചുവടിടറിത്തുടങ്ങുമ്പോള്‍

ഇറക്കി വയ്കാനൊരു മാത്ര

മനക്കോട്ടകള്‍ ഒന്നു തുറന്നിടാന്‍

കൊതിക്കുന്നു ഞാന്‍

പാവം സഞ്ചാരി...

ഒട്ടു നാളായി മഴ തുവാതെ

ഇളവെയിലെല്‍ക്കാതെ പൊത്തി

സുക്ഷിപ്പൂ വില കുറഞ്ഞ സ്വപ്ന-

പൊതികള്‍ , കൊടികുറകള്‍

എന്റെ വാക്ക് പൊട്ടിയ പഴംകഥകള്‍ !

ഇടറി വീഴും മുന്‍പേ ഞാന്‍ ഒരു നട ഇറങ്ങട്ടേ

വിണ്ടുകീറും മുന്‍പേ ഞാന്‍ വിട ചൊല്ലട്ടെ

എനിക്കീ നഗര-സത്യം കയ്ച്ചു പോയിരിക്കുന്നു !!

കവിത, ഡയറി, ഞാന്‍ , സഞ്ചാരി

നാണയക്കിലുക്കം

2010-09-25T17:42:00.000-07:00

ഇന്നലെ എന്റെ സ്നേഹത്തിനു വില പറഞ്ഞവള്‍
ഇന്ന് തെരുവോരത്ത് വിലയ്ക്കിടുന്നത് കണ്ടു
അതേ സ്നേഹം !
നിറവും രുചിയും അല്പം മാറ്റം!

മിനിഞ്ഞാന്നിരുട്ടത്ത് എന്‍ സുഹൃത്തിന്‍ കാതില്‍
ജീവത്യാഗം മൊഴിഞ്ഞവളിന്നു
വയറ്റുഭാരം കീറി അകറ്റാന്‍ വീര്‍പ്പു മുട്ടുന്നു
എന്നിട്ട് വേണം നമ്രമുഖിയാം വധു ചമഞ്ഞിടാന്‍ !

ചേലില്‍ ചേല ചുറ്റി ദേവാലയമുറ്റത്ത്‌
കന്യാംബികാ ചമത്കാരം വെയ്കും കുഞ്ഞമ്മച്ചികള്‍,
റോഡരികില്‍ ഒതുക്കിയ ടവേരയില്‍
തിരു-തീവ്ര-കാമകീര്‍ത്തനം പാടി പഠിച്ചാലും
പഠിച്ചു തോറ്റാലും നിനക്കെന്ത്, എനിക്കെന്ത്
നമുക്കെന്ത് കൂട്ടരെ?

അമ്മ-പെങ്ങള്‍-പത്നി പുളിച്ചു പോയാലും
നമുക്കും കിട്ടണം പണം ;
ഇതല്ലേ നിന്നെ "നീ"യും
എന്നെ "ഞാനും" നമ്മെ "നാമും"
ആക്കുന്ന മന്ത്രധ്വനി .....നാണയ കിലുക്കം!

സ്വപ്‌നങ്ങള്‍ സാക്ഷിയായ് സഖീ

2010-09-21T20:01:00.000-07:00

എന്റെ മനസ്സിന്‍ പാഴ്മതിലില്‍
ഞാന്‍ വരച്ചൊരു കുഞ്ഞു സ്വപ്നമാണു
നീ സഖീ ..
നീ ചിരിച്ചൊതുക്കിയ
പിഞ്ചു കിനാവിലെ പുല്‍ നാമ്പു
മാത്രമീ ഞാന്‍ സഖീ...

എത്ര ചൊല്ലി കലമ്പിയാലും
മിഴിയെത്ര പൂട്ടി പതറിയാലും
ചിരി വരാതീ ചോരിവാ കൂട്ടി ചിനുങ്ങിയാലും
മഴ തുവിയിറങ്ങും പോലീ മനം
കാത്തിരിക്കും എത്ര നാല്ക്കുമെനിക്കായിട്ടീ
ക്ളാസ്‌മുറിയില്‍ പ്രിയേ, ഓമലെ !

നീ പറയാന്‍ മറന്നതോ
പറയാതെ വിട്ടതോ
ഞാന്‍ നിന്നെ സ്നേഹിച്ചതരിഞ്ഞിരുന്നു
നീ സഖീ ഒരു നൊടിക്കെന്കിലുമെന്നു !

വിട പറയുമ്പോള്‍ മിഴികളില്‍ മൌനം
ശുഭയാത്ര നേര്‍ന്നിടത്തിന്റെ പാതി ജീവനും
മുഴു ചിരിയും ഞാന്‍ മറന്നിട്ടു പോയ് സഖീ;
ഒരു മാത്ര തരികെന്റെ പുഞ്ചിരിയെങ്കിലും തിരികെ,
ഒരു നിര ചിരിച്ചിട്ടു മടങ്ങിക്കൊല്ലം
ഞാനെന്‍ മനസ്സിന്റെ ഫ്രെയിമിലെ
പഴയ ചിരിക്കുട്ടനായി !

http://www.youtube.com/watch?v=m5viwwB6ecI&feature=player_embedded

ചെറിയ ലോകവും വലിയ പോലീസും

2010-08-26T09:04:00.000-07:00

Cheriya Kallanum Valiya പോലീസും ഇങ്ങനെയും ഒരു പടം ഇറക്കി മനുഷ്യനെ വെറുപ്പിക്കാം എന്ന് തെളിയിച്ച സംവിധായകാ ..നന്ദി!
Release Date : 27 Feb 2010
Genre : Comedy
Language : Malayalam
Cast : Mukesh, Jagadish, Vidya, Jagathy Sreekumar, Kochu Preman, Innocent, Mala Aravindan, Suraaj Venjaramoodu, Manraj, Ratheesh Pallat, Usha, Ponnamma Babu.

ingane mnushyane drohikalle piyappettavare!

ഷെര്‍ലക്ക്‌ ഹോംസ്‌(2009)

2010-02-25T00:20:00.000-08:00

ഇന്നെലെയാണു ഞാന്‍ ഈ സിനിമ കണ്ടത്‌. ഡൊണ്‍ലോഡ്‌ ചെയ്തിട്ടു കുറച്ചേറെ നാളുകളായെങ്കിലും ഇപ്പോഴാണു സമയം കിട്ടിയതെന്നു വേണമെങ്കില്‍ പറയാം.
എനിക്കിത്‌ ഇഷ്ടപ്പെട്ടു. വളരെ നല്ലത്‌ , ഉദ്വേഗജനകം എന്നൊന്നും പറയാനാവില്ല. കണ്ടിരിക്കാം...thrill സൂക്ഷിക്കുന്നുവെന്നിരിക്കിലും ചിലയിടങ്ങളില്‍ അല്‍പ്പം commercialism പ്രകടമാണ്‌. കഥാപാത്രങ്ങളും അനുരൂപരായ നടീനടന്മാരും ചിത്രീകരണരീതിയും നിലവാരം പുലര്‍ത്തുന്നു. പക്ഷെ, ഞാന്‍ കണ്ട പ്രധാന ന്യൂനത നാളിതു വരെ മനസ്സില്‍ വച്ചാരാധിച്ച ഹോംസിന്റെ (റോബര്‍ട്ട്‌ ദ്രോവ്നി ju.) ഭാവ,വാഹാദികള്‍ കണ്ടെത്താനായില്ല എന്നതാണ്‌. ഒരു തരം കോമിക്‌ ക്യാരക്ടര്‍! നോവലിലെയോ ഇതു വരെ വായിച്ചറിഞ്ഞ പോലെയോ ഉള്ള ഹോംസിന്റെ ഗൗരവമോ, ധാര്‍ഷ്ട്യമോ തീരെയില്ല. ഡോ.വാട്സന്‍ (ജൂഡ് ലോ) കൊള്ളാം..പക്ഷെ, ഹോംസിനു മേല്‍ ആവശ്യത്തിലുമേറെ സ്വാധീനം കാണിച്ചുവോ എന്നു സംശയം! ..എനിക്കേറെ ഇഷ്ടമായത്‌ Dr.Blackwood (മാര്‍ക്ക്‌ സ്ട്രോങ്ങ്‌) ആണ്‌;നല്ല വില്ലന്‍!!
ഹോംസ്‌ സീരിസിലെ സ്ഥിരം വില്ലനും ഹോസിന്റെ ആജന്മശത്രുവുമായ പ്രൊ.മൊറിയാര്‍ട്ടിയും പ്രതിപാദിക്കപ്പെടുന്നുണ്ടെങ്കിലും നാമമാത്രമായി മാത്രം! അടുത്ത ഭാഗം ഉറപ്പ്‌!!
റ്റൈറ്റില്‍ സ്റ്റെയിലും വളരെ നന്നായി....ഒരു ബുക്ക്‌ വായിച്ചു തീരുന്ന ഫീലിംങ്ങ്‌ തന്നു....

എമ്പറര്‍ ഇമാനുവല്‍ ട്രസ്റ്റ് ....ഒരു വലിയ അപകടം: സഭയുടെ വാക്ക്

2010-01-10T16:28:00.000-08:00

ബഹു-വാലുകള്‍ വേണോ സഖേ?

2009-07-30T21:20:00.001-07:00

നോട്ടീസിലും ശിലാഫലകത്തിലുമൊക്കെ കാണുന്ന ബഹുമന്ത്രി!

ബഹുമന്ത്രി എന്നെഴുതിയ ഫലകം ബഹുമന്ത്രി തന്നെ അനാവരണം ചെയ്യുന്നത്‌ ആണ്ടി വലിയ അടിക്കാരനാണെന്നു ആണ്ടി തന്നെ പറയുന്നതു പോലെയല്ലേ എന്നു ചോദിക്കാം. മന്ത്രി ബഹുമാനപ്പെട്ട മന്ത്രിയാണെന്നു മന്ത്രിയെങ്കിലും പറയണ്ടേ എന്നൊരു മറുന്യായത്തിനും വകുപ്പുണ്ട്‌.
.....
ആരെങ്കിലുമൊരാള്‍ ബഹുമാനപ്പെട്ടതാണോ അല്ലയോ എന്ന് ആരാണു തീരുമാനിക്കുന്നത്‌ ബഹുമാനപ്പെട്ടവരേ?

മന്ത്രി വെറും ബഹുവാണെങ്കില്‍ മേയര്‍ ആരാധ്യനാണ്‌. ബഹുവാണോ ആരാധ്യനാണോ കേമന്‍ എന്ന ചോദ്യത്തിനു മാങ്ങ - അണ്ടി നിലവാരമേയുള്ളൂവെങ്കിലും, ഒരു മേയറെ ആരാധിക്കുന്ന എത്ര പേരുണ്ടാവും ഈ നാട്ടില്‍? കുറഞ്ഞപക്ഷം സ്വന്തം നഗരഭരണപ്രദേശത്തെങ്കിലും?

തന്നെയുമല്ല, ബഹുമാനിച്ചു തീര്‍ന്നിട്ടു വേണ്ടേ ആരാധിക്കാന്‍?
......
ഈയിടെ ഒരു മേയറെ നോട്ടീസില്‍ കുത്തിട്ടു ചുരുക്കിയിരിക്കുന്നത്‌ കാണാനിടയായി.

ആരാ.മേയര്‍!

അതു തന്നെയാണു ചോദ്യം:
ആരാ മേയര്‍??????

(മനോരമ ദിനപത്രത്തിലെ "തരംഗങ്ങളില്‍" എന്ന പനച്ചിയുടെ പംക്തിയില്‍ കണ്ട ചില വാചകങ്ങള്‍!!!)

പാഠം ഒന്ന്‌!

2009-06-27T17:54:00.000-07:00

വറ്റിപ്പോയ കണ്ണിണകളെ പരിഹസിക്കരുത്‌;
നിണമണിഞ്ഞ കാല്‍പ്പാടില്‍ ഇമയുടക്കരുത്‌;
നിഴല്‍ക്കൂട്ടങ്ങളിലഭിരമിക്കരുത്‌;
നമുക്കുമപ്പുറം 3rd പേഴ്സണ്‍ സിംഗുലറില്‍
ആരോ വിതുമ്പുന്നതറിഞ്ഞെന്നു നടിക്കരുത്‌;

നനവറിയാതെ
തുണ്ടുനോവറിയാതെ
ഇനി ഈ കിളി കൂടി
പറക്കുന്നിടം വരെ കാക്കുക!

ചുട്ടുതിന്നാനൊരു പിടി
കുഞ്ഞിളം മാംസം..
എന്താ നിനക്ക്‌ കയ്ക്കുമോ?

നല്ലോരു വേടന്‍....
ഇരയ്ക്കു മുന്‍പിലിമ
വെട്ടാതിരച്ചെത്തി
വല്ലാതെ കൊല്ലുന്നവന്‍!

വേണ്ടാത്ത adjectivesല്‍
കാല്‍ തട്ടിവീഴാതെ
നടക്കുക..

ഇത്‌
ഒന്നാം പാഠം!!
പാഠമിനിയെത്ര ബാക്കിയെന്ന്
നീയും ചിരിച്ചുവോ?
തോന്നലാവാം!!

കുട്ടനാട്‌

2009-04-27T11:47:00.001-07:00

പൊഴിഞ്ഞടരാത്തൊരോര്‍മ്മ
ഞാന്‍
നനയ്ക്കാതെന്നുള്ളില്‍ വിരിഞ്ഞവള്‍ നീ,
നിന്റെ നറുമണങ്ങളില്‍ നിന്നവരെന്നെ കവരും
മുന്‍പേ
പ്രിയേ, പ്രകൃതീ..

കാത്തു നില്‍ക്കുക

2009-02-21T15:07:00.000-08:00

നീ ഇത്ര നേരം പറഞ്ഞിടത്ത്‌
എന്റെ ആത്മാവിനെ നീ
ഉറക്കിക്കിടത്തുകയായിരുന്നുവോ?
എല്ലാം മായ എന്നു ചൊല്ലി
എല്ലാത്തിനെയും
തഴഞ്ഞു കളയാന്‍
ഞാന്‍ മുതിരുമ്പോളെന്തിനു നീ
എന്നിലൊരു കുഞ്ഞുകൂടു കെട്ടി

പാര്‍ത്തൂ....?

സ്നേഹം നിസ്സാരമാണെന്ന്
അതിനു വില
തുച്ഛമാണെന്ന്
ഞാറ്റുവേലകളില്‍ അതിനും നിറം മാറുമെന്ന്
എന്നൊന്നും ഞാന്‍
പറയുന്നില്ല.
പക്ഷെ
പക്ഷെ അറിയാതെ ഞാനത്‌ വിശ്വസിച്ചു
എന്നെ ഈ ലോകം
വിശ്വസിപ്പിച്ചു!

അതു കൊണ്ട്‌
ഞാന്‍ നിനക്കായി
കാത്തീരിക്കുന്നിടത്ത്‌,
നിന്റെ മൂക്കിന്‍തുമ്പിലൊരു
വിയര്‍പ്പുതുള്ളി
നോക്കിയിരിക്കുന്നിടത്ത്‌,
നിന്റെ ഹൃദയതാളങ്ങളിലേതോ
പുഴ തേങ്ങുന്നത്‌
ചെവിയോര്‍ക്കുന്നിടത്ത്‌,
ഞാന്‍ സ്നേഹിക്കപ്പെടാതിരിക്കാനൊരു
കടവ്‌
തീര്‍ക്കുന്നു;
നിനക്കിറങ്ങാനാവാത്ത കടവ്‌!

എന്നിലൊരു പുതപ്പായിട്ടുണ്ട്‌
നീ;
നിലാവിനു പോലും പിഴാനാവാത്ത വിധം!
എങ്കിലും
കാലത്തിനേടില്‍ ഞാന്‍ ഒരു
"സഞ്ചാരി"!

അതിനാലെന്റെ വിശ്വാസത്തിലെ
കറയുണങ്ങുന്നതു വരെയൊന്നു
കാക്കുക!
എന്നിലെ താളത്തിനിമ്പമാകും വരെ കാക്കുക!
നിനക്കുറങ്ങാനൊരു
കൂടും
നിന്‍ക്കിറങ്ങാനൊരു കടവും
ഞാന്‍ തീര്‍ത്തു കൊള്ളും വരെ
കാക്കുക!
കാത്തു നില്‍ക്കുക!

സര്‍പ്പഗന്ധി: കൗമാരസ്വപ്‌നങ്ങളിലെ മഞ്ഞ്‌

2009-02-16T02:01:00.000-08:00

സര്‍പ്പഗന്ധി: കൗമാരസ്വപ്‌നങ്ങളിലെ മഞ്ഞ്‌

super!!!

ഒരു ഓര്‍ക്കുട്ടന്റെ വിലാപം!

2009-02-09T01:14:00.000-08:00

ഒാര്‍മ്മയുണ്ടോ ഈ മുഖം?
ഓര്‍മ്മ കാണില്ല!

അന്നു നിന്റെ ഫ്രണ്ട്സ്‌
ലിസ്റ്റില്‍ രണ്ടേ രണ്ടു പേര്‍! ഞാനും പിന്നൊരു മോനും..

ഏതോ 18+ കമ്മ്യൂണിറ്റിയില്‍ മെംബെര്‍ഷിപ്‌ കിട്ടാതെ
പ്രൊഫെയില്‍ നോക്കി കരഞ്ഞ നിനക്ക്‌
കോലുമുട്ടായി വാങ്ങിത്തന്നാശ്വസിപ്പിച്ചു ഈ ഞാന്‍!

ഫാന്‍ വേണം, ഫാന്‍ വേണം എന്നു നീ കരഞ്ഞപ്പോള്‍,
നിനക്കു വേണ്ടി 5 പ്രൊഫെയില്‍ ഉണ്ടാക്കി
നിന്നെ ഫാന്‍ ആക്കി ആ അഞ്ചിലും ആഡ്‌ ചെയ്തത്‌
സ്ക്രാപ്പുകളുടെ കുത്തൊഴുക്കില്‍ നീ മറന്നു.

ടെസ്റ്റിമോണിയല്‍ ഇല്ലാതെ നീ വിഷമിക്കുന്നത്‌ കണ്ട്‌
ഫേയ്ക്ക്‌ പ്രൊഫൈല്‍ ഉണ്ടാക്കി
ബ്ലാക്‍മെയില്‍ ചെയ്ത്‌ ആളുകളെക്കൊണ്ട്‌
ടെസ്റ്റിമൊണിയല്‍ ഇടീച്ചത്‌
താഴെക്കിടക്കുന്ന ടെസ്റ്റിമോണിയല്‍സ്‌ കാണുമ്പോഴെങ്കിലും
നിനക്കൊന്നോര്‍ത്തു കൂടേ?

വൈകുവോളം സ്ക്രാപ്പിട്ടാല്‍ കിട്ടുന്നത്‌ ചായയും വടയും!
അതില്‍ ചായ കുടിച്ച്‌,
വട നിനക്കു കൊണ്ടുത്തരുമാരുന്നു ഞാന്‍!

ഇനിയുമെത്ര കാലം മരുഭൂമിയായി
എന്റെ സ്ക്രാപ്പ്ബുക്ക്‌ കിടന്നാലും തളരില്ല ഞാന്‍!

കഴിഞ്ഞു പോയ സ്ക്രാപ്പുകളുടെ വസന്തകാലം
എന്നെ മുന്നോട്ടു നയിക്കും...

ജയ്‌ ഞാന്‍!!

പ്പ്‌ ..പ്പ്‌!

2009-02-07T03:43:00.000-08:00

ഹോപ്പില്ലാത്ത യുവാക്കള്‍
കോപ്പ്‌ വാങ്ങാന്‍
ഷോപ്പിപ്പോയി
റോപ്‌ വാങ്ങി
തോപ്പില്‍ പോയി
ലൂപ്പുണ്ടാക്കി
ലൈഫ്‌ സ്റ്റോപ്പ്‌ ചെയ്തു!

(കടപ്പാട്‌ : ഫാ.ജോമോന്‍ കണിയാപറമ്പില്‍)

കടം താ ഒരു കണ്ണീര്‍ത്തുള്ളി

2009-02-07T03:04:00.000-08:00

ചെത്തിപ്പൂളാത്തതൊന്നും
ചുരണ്ടിവടിക്കാത്തതൊന്നും
മുറിച്ചു കീറാത്തതൊന്നും
നിലവിളിക്കാത്തതൊന്നും
പൊട്ടി വിണ്ടാത്തതൊന്നും

ഇതൊന്നും
മനസ്സെന്ന പേരിനെ പേറുന്നില്ല!

പക്ഷെ എന്തു ചെയ്യാം?
നിറങ്ങളില്‍ മുങ്ങിമരിച്ചവന്റെ ആത്മാവിനെ
നരച്ചിടത്തു കബറടക്കിയ
തലമുറയില്‍ ജീവിക്കുന്ന നമുക്ക്‌
മനസ്സിനെ പീലിക്കെട്ടില്‍ ചൂടപ്പെട്ട
പുഴമീന്‍ഗന്ധമായി
പുഴുങ്ങി സൂക്ഷിക്കാനിഷ്ടം!

നമ്മുടെ "സുഗന്ധം" നമ്മളറിഞ്ഞാല്‍പ്പോരെ
എന്നാത്മഗതം!നിന്റെ ഗതം!

സാരമില്ല;
ഇനിയൊരു കണ്ണീര്‍ത്തുള്ളി കടം താ
എന്നു പറഞ്ഞു നീയെന്റെ വീട്ടുപടിക്കല്‍
വരും....
അന്നു ഞാന്‍ എന്റെ കണ്ണീര്‍ക്കുടം
നിന്റെ മുന്‍പിലഹങ്കാരത്തോടേ
കുടഞ്ഞൊഴുക്കിത്തീര്‍ത്തിട്ട്‌"ഇറങ്ങി പ്പോ"
എന്നാട്ടും!
അതാണെന്റെ മറുപടി...നരച്ചവരുടെ
പുഴുങ്ങപ്പെട്ടോരുടെ തലമുറേ!

അതു വരേക്കും
ഞാനിവയിരുന്നു കടഞ്ഞെടുക്കട്ടേ..
ഇതറിഞ്ഞതു കൊണ്ടു വരാതിരിക്കാനാവില്ല നിനക്ക്‌;
ചാത്തന്മാര്‍ വരുത്തും നിന്നെ!

"എന്നെ വിവാഹിക്കൂ"

2009-02-06T00:10:00.000-08:00

അത്ര ചിരിക്കാനീലൊന്നും;
നീ പറഞ്ഞ പാഴ്‌വാക്കിലിവിടെ
മഴക്കാറ്റ്‌ വീശിയേക്കാം;
പക്ഷെ കൊടുങ്കാറ്റാവില്ലാന്നുറപ്പ്‌!
ഇത്തരമെത്ര കുഞ്ഞുകാറ്റുകളെനിക്കു
മുന്‍പിലുരുവാര്‍ന്നുണങ്ങി വീണിരിക്കുന്നു?

"നീ ഒരു കൊടിച്ചിയാകുന്നു"
അതു പറയുമ്പോളെന്നെ ഞാന്‍ ഉമ്മിക്കുന്നു*1
എന്റെ പക ഞാനുരിഞ്ഞു കളയുന്നിടത്തെന്റെ
ചരിത്രം ഒറ്റയ്ക്കാവുന്നു;
അതിനാല്‍ അതു വേണ്ടാ..
മഴക്കാറ്റാണു ഭേദം!

ഇനി നിനക്ക്‌ വേണ്ടാത്തൊരു മതവുമെനിക്കും വേണ്ടാ;
നീ തീണ്ടാത്തൊരു തത്വവുമെനിക്കും വേണ്ടാ;
നിലവിളിക്കാത്തൊരു കുഞ്ഞാടിനേം വേണ്ടേ വേണ്ട!

ഇതിനര്‍ത്ഥം
ഞാന്‍ നിന്നെ ഗാഢമായി പ്രണയിക്കുന്നു
എന്നാണു നിനക്കു മനസ്സിലായതെങ്കില്‍
എനിക്കു നിന്നെയും വേണ്ടാാാ..

ഇനി ഒരു തൊല്ല കൂടി
താങ്ങാന്‍ വയ്യെന്റെ പൊന്നേ!

--------------------------------------

ഒരു വിടവാങ്ങല്‍- ഓര്‍മ്മക്കുറിപ്പ്‌!

2009-01-18T04:37:00.000-08:00

" നിന്റെ സ്വകാര്യത
ഞാന്‍ നഷ്ടപെടുത്തുന്നില്ല...
നമ്മള്‍ അവസാനമായി
വിട പറയുകയൊന്നും അല്ലല്ലൊ? ആണോ?
എനിവേ, ഇതു
നിന്റെ ജീവിതത്തിലെ വഴിത്തിരുവുകളില്‍ ഒന്നാണല്ലോ....
നല്ലൊരു തുടക്കത്തിലേക്കു
ഇതു അവസാനിക്കട്ടെ!
ഞാന്‍ പ്രാര്‍ത്ഥിക്കും
എന്റെ നല്ല കൂട്ടുകാരനു വേണ്ടി..എന്നും!

പിന്നെ നിനക്കു ഫീലിങ്ങ്സ്‌ ഉണ്ടു
എന്നൊന്നും നീ എന്നോടു പറയണ്ട;
എനിക്കു അതു നന്നായി അറിയാം.
നിന്റെ പ്രിയപ്പെട്ടവര്‍ എന്നും
നിന്റെ കൂടെ കാണട്ടെ!

കഴിഞ്ഞ കാര്യങ്ങള്‍ ഓര്‍ത്തു വിഷമിക്കണ്ട..
കാലം സത്യങ്ങള്‍ പുറത്തു കൊണ്ട്‌ വരും.
സ്വന്തമായവരെ അടുത്തേക്കും!!!
...പക്ഷെ, സ്വന്തമായവരെ മാത്രം...
അങ്ങനെ വന്നില്ലെങ്കില്‍ അതു നിന്റെതല്ല..
that's all!

നീ മറക്കില്ല എന്നു വിശ്വസിക്കാനിഷ്ടം;
എളുപ്പവും!
ഇനി ഞാന്‍ എന്തു പറയാന്‍!
ശുഭയാത്ര.....
ഇവിടെ തുടങ്ങുന്ന സഞ്ചാരിയുടെ
പുതിയ യാനത്തിനായി!
ഈ നിതന്ത യാത്രയില്‍
നമ്മള്‍ ഇനിയും കാണില്ലെന്നാരു പറഞ്ഞു?
കാണാത്തതു പലതും കാണാനായി
നമുക്കിനി കുറച്ചു നേരം കണ്ണടച്ചു പിടിക്കാം,....
ബൈ..
എ വെരി വെരി ഹാപ്പി ജേര്‍ണി!"

***ആന്‍ മരിയ (27 ആഗസ്റ്റ്‌ 2008 : 22.00)

ഇത്‌ എന്റെ കൂട്ടുകാരി ആന്‍ എനിക്കയച്ച വിടവാങ്ങല്‍ SMS..ഞാനിത്‌ ഒരിക്കല്‍ മാത്രം വായിച്ചു. Inboxഇല്‍എവിടെയോ മറഞ്ഞു പോയിത്‌ ഞാനിന്ന് വേറെന്തോ നോക്കുമ്പോ ഒരിക്കല്‍ കൂടി കണ്ടു...ഒത്തിരി സന്തോഷവുംസങ്കടവും തോന്നി. അവളെനിക്ക്‌ താങ്ങായിടങ്ങളൊക്കെ ഓര്‍ക്കുമ്പോ ഒരു സുഖം...സ്വന്തമായവരുടെവരികളിലൂടെ ഒഴുകി നീങ്ങുമ്പോ ഉള്ളു നോവുന്നു...എന്നെ അടിമുടി തകര്‍ത്തു കളഞ്ഞ ഒരു ബന്ധത്തിന്റെ ഊടുംപാവും നേരിട്ടറിഞ്ഞവളാണിത്‌...ഞാന്‍ ഉടനെ അതിനെക്കുറിച്ചൊരു പോസ്റ്റ്‌ ഇടണമെന്നു വിചാരിക്കുന്നു. പക്ഷെഎഴുതാന്‍ തുടങ്ങുന്നിടത്തൊക്കെ ഞാനവളെ ഇന്നും സ്നേഹിച്ചു പോകുന്നുവെന്നും ഒന്നും അവളെകുറ്റപ്പേടുത്തിയെഴുതാന്‍ എനിക്കാവില്ലെന്നും തിരിച്ചറിഞ്ഞു തളര്‍ന്നു ഞാനവ ഡീലീറ്റ്‌ ചെയ്യുന്നു. ഒരു നല്ലസുഹ്രുത്തിന്റെ യാത്രാമംഗളങ്ങള്‍ മാത്രമായി മുകളില്‍ കൊടുത്തതിനെ കാണുക! അവളിപ്പോ ചെന്നൈയില്‍ജോലി ചെയ്യുന്നു. ഒരു പാവം പാലാക്കാരി!!!

അവലോസുപൊടി- എന്‍ പ്രണയം

2009-01-13T02:58:00.000-08:00

അവളെനിക്കുമപ്പുറം ദൂരെ മേഞ്ഞുകൊണ്ടിരുന്നു
എനിക്കു മടുത്തു തുടങ്ങി;
ഇത്ര നിലവിളികള്‍ക്കൊറ്റ രാത്രി;
ഇവയ്ക്കു പിറക്കാന്‍ നേരവും
ക്ഷിതിയുമൊന്നുമില്ലേ?
ആര്‍ക്കറിയാം..!

ദുരന്തങ്ങള്‍ക്ക്‌ ഒരു മാനേഴ്സില്ല,
ഇതിനെയൊക്കെ പഠിപ്പിക്കാന്‍ ഏറെയുണ്ടെനിക്ക്‌
പക്ഷെ ആരും ഒന്നും എന്നോട്‌ ചോദിക്കുന്നില്ലല്ലോ;
ചുമ്മാ
തോന്നുമ്പോള്‍ വന്നും
മടുക്കുമ്പോള്‍ പോയും
അവരെന്നെ സ്നേഹിക്കാന്‍ പഠിപ്പിക്കുന്നു;
ക്ഷമിക്കാന്‍ പ്രേരിപ്പിക്കുന്നു.

ചില നേരത്തീയിടെയായി
സ്നേഹം പോലും ദുരന്തമായിപ്പോകുന്നു!
സ്നേഹത്തിന്റെ പേരിലൊത്തിരി മായം
ഞാനിതിനകം തിന്നു കഴിഞ്ഞു.
കുടിക്കാനൊന്നുമില്ലാതെ
അവലോസുപൊടി വിഴുങ്ങിയ വിശപ്പുകാരനെ
ഓര്‍ക്കുക....
ഇതാണെന്റെ പ്രേമങ്ങള്‍!

"ഇനിയെനിക്ക്‌ ഈ പഴം വേണ്ട"
ഇത്രയാവര്‍ത്തി ഈ വാക്ക്‌ ഞാനെനിക്ക്‌
പുഴുങ്ങിക്കൊടുത്തിരിക്കുന്നു.....!!!
പിന്നേം വരുമേതേലുമവള്‍!
എന്നെ കൊതിപ്പിച്ച്‌
എന്നെ ചിരിപ്പിച്ച്‌
"നിന്റെ മാത്രം","നിനക്ക്‌ വേണ്ടിയെന്തും"
"ഒരുമിച്ച്‌ മരിക്കാനും തയ്യാര്‍"
എന്നൊക്കെ പറഞ്ഞ്‌..
പിന്നേം വരുമേതേലുമൊരുവള്‍!

ഞാനൊരുത്തന്‍ ഇങ്ങനെ വീഴാനുമിരിക്കുന്നു.
ഇതാണിന്നത്തെ പാവം ആണ്‍കുട്ടി!
ഞാനൊരു പാവം ആട്ടിങ്കുട്ടി..
എന്താ, ശരിയല്ലേ അളിയാ?

കുരുപ്പേ...നിന്റെ സെറിലാക്‌!

2009-01-11T02:44:00.000-08:00

LKG ക്ലാസിലെ ലാസ്റ്റ്ബെഞ്ചിലെ താരങ്ങളുടെ ഒരു സംഭാഷണശകലം hack ചെയ്തത്‌ വായനക്കാര്‍ക്ക്‌ വേണ്ടി പോസ്റ്റ്‌ ചെയ്യുന്നു.

താരം 1: "അളിയാ, ഞാന്‍ ആകെ അപ്‌സെറ്റാടാ!!"
താരം 2: "എന്നാ അളിയാ, എന്നായേലും പ്രോബ്ലം ഉണ്ടൊ വീട്ടില്‍?"

താരം 1: "അതല്ലളിയാ, ഇന്നലെ ഞാന്‍ സ്ലേറ്റ്‌ വാങ്ങാന്‍ ബിഗ്‌ബസാറില്‍ പോയളിയാ..അവിടെ ഒരു ഒന്നര വയസുള്ള സൂപ്പര്‍ ഫിഗറിനെ കണ്ടെടാ..അവളുടെ അമ്മയുടെ ഒക്കത്തിരുന്നു അവളെന്നെ നോക്കിച്ചിരിച്ചെടാ..എന്റളിയാ, എനിക്കങ്ങ്‌ കോരിത്തരിച്ചു..അതു കഴിഞ്ഞ്‌, എത്ര നേരം കാത്തീരുന്നിട്ടും അവളെന്നെ മൈന്‍ഡ്‌ ചെയ്തില്ലടാ..I am so upset ..2 ദിവസമായി ഞാന്‍ സെറിലാക്‌ കഴിച്ചിട്ട്‌!
താരം 2: "ഡോണ്ട്‌ വറി അളിയാ, നാളെ നമുക്കവളെ തൊട്ടിലോടെ പൊക്കിയേക്കാം.."

താരം 1: "പതുക്കെപ്പറയളിയാ, ഇനി ഇതു കേട്ടിട്ടു വേണം ഏതേലും നത്തോലി അതെടുത്ത്‌ ബ്ലോഗിലിടാന്‍!"

വഴിയിലെ ചിലര്‍

2008-12-17T21:47:00.000-08:00

ജനനം
ഞാനിന്നലെ മറന്നു കളഞ്ഞ മഷിക്കുപ്പിയില്‍
നിന്റെ ഹ്രുദയത്തിലെ എണ്ണ;
നിനക്കു പോലും വറ്റിത്തുടങ്ങിയ മിഴിവിന്റെ
പനപ്പ്‌ നിറഞ്ഞ എണ്ണ;
അതുമെനിക്കൊടുവില്‍ കളഞ്ഞു പോയി..

ബാല്യം

ഇനി നിലയ്ക്കാപ്രവാഹങ്ങളില്‍ തിരയാനീലൊന്നും;
പുഞ്ചിരിയുപ്പു കൂട്ടി ഞെരടിയൂട്ടാനമ്മയില്ല ചാരെ;
പുഴപ്പാതിക്കകലെ,മാടത്തിലച്ഛനീല;
പഴഞ്ചാക്കു കോട്ടി തയ്ച മഴക്കോട്ടിലെന്റെ
ബാല്യം ചുരുണ്ടു മയങ്ങി, മയങ്ങീല തെല്ലും!

കൗമാരം

"ഞാന്‍ പിഴയാളി" പാടാനറയ്ക്കാത്തീപ്പകലിന്‍ പിഴ;
ചോപ്പേറെ വാരിത്തന്നൂട്ടി, കൊടിക്കൂറ നാട്ടി
ഞൊട്ടിത്തൂറാനൊരുപിടി മുദ്രാവാക്യക്കൂടും തന്നീ-
പ്പഴരാജവീഥിക്കുള്ളിലൊറ്റയ്ക്കാക്കി മറയേണ്ടും
മരുത്തേ, പാര്‍ട്ടി വയോധികാ,തുണയൊരു കുഴിമാടമാകുമോ?

യൗവനം

ഞാന്‍, "ഞാനത്വം" നശിച്ചു വിരമിച്ച നിഴല്‍പ്പാളി
പൊട്ടക്കരിഞ്ചാക്കിലമൃത്‌ തേടിയ യൗവനന്‍.
അലനീളം പേറിയൊടുങ്ങാ,നിശകളീ
ക്ഷിപ്രദീപത്തിലോര്‍ത്തു മയങ്ങീ,
തിരയാര്‍ത്തുനേര്‍ത്ത പകലിലൊത്തിരി ചോര നേദിച്ചീ-
ത്തീവ്രവാദപ്പുഴയൊരുക്കി ദിഗംബരന്‍; ഞാന്‍!

മനുഷ്യന്

‍എന്താണിത്‌?
കേള്‍ക്കുമ്പോളറയ്ക്കുന്നീപ്പദാവലി,
യെന്നെപൊള്ളിച്ചടരുന്ന ദാരുണത്വം!
ഇല്ലാത്ത നേത്രത്തിലിനിത്തരുക
കാഴ്ച; വീഴ്ച മാറ്റാനല്ലയെന്നാകിലും!
പുലരാ ഹ്രുത്തിലിനി,യേറ്റുക-
നുതാപം; വൃത്തി തേടാനില്ലയെന്നാകിലും!
എനിക്കറിയേണ്ടുന്നതിനിയൊന്നു മാത്രം...
"എന്തിനെന്നെ മനുഷ്യനായി വാര്‍ത്തീ
മുടിഞ്ഞിടത്തൊറ്റയ്ക്കിട്ടു ദിക്കുകളേ.."
ക്ലാവില്ലാത്തൊരു സന്ധ്യയുണ്ടാവുകില്
‍ജന്മ"പെസഹാ"കള്‍ക്കുമപ്പുറം
തീണ്ടാരിച്ചോരയിലെനിക്കും വേണമൊരു
മാമ്മോദീസാ...!!!

(പെസഹാ=കടന്നു പോകല്‍)

ഇഷ്ടമില്ലാത്ത ഉടുപ്പ്‌

2008-10-23T19:52:00.000-07:00

ഇന്നലെ ഞാന്‍ ഒരു പഴകിയ മണമുള്ള സ്വപ്നം കണ്ടു.
അതിലിന്നു ഞാന്‍ ദുഖിക്കുന്നു...
കാരണം ഉറക്കമെണീറ്റപ്പോള്
‍പുതുമ മാത്രം ഇഷ്ടപ്പെടുന്നവന്‍ ഞാന്‍!

എന്റെ ഇന്നത്തെ ഉടുപ്പ്‌ എനിക്കൊട്ടുമിഷ്ടമായില്ല.

എന്തു ചെയ്യാന്‍?

ഇഷ്ടമില്ലാത്തിടാന്‍ വിധിക്കപ്പെടുന്നത്‌,
വേണ്ടാത്തിടത്ത്‌ കരയേണ്ടുന്നത്‌,
മടുപ്പുള്ളിടത്തും പുകള്‍ പാടേണ്ടുന്നത്‌,
വിലക്കുള്ളിടത്തും വില കൊടുക്കേണ്ടുന്നത്‌,
മീച്ചമില്ലാത്തിടത്തും പുഞ്ചിരിക്കേണ്ടുന്നത്‌,
അങ്ങനെയങ്ങനെ ....എത്രയെത്ര "എന്തു ചെയ്യാനു"കള്‍?

നിറങ്ങള്‍ മങ്ങിയ സ്വപ്നങ്ങള്‍;
രതിമണം കലര്‍ന്ന്‌ വിണ്ടുപോം ചിത്രങ്ങള്‍;
അടുക്കി പൂട്ടും തോറും തിങ്ങിപ്പൊട്ടും നെടുവീര്‍പ്പുകള്‍;
ചെന്നി പിളര്‍ന്ന്‌ തലയിണ നനയ്ക്കും "ഇന്നലെ"ച്ചിത്രങ്ങള്‍;
പിന്നെ, കണ്ണുരുക്കി കവിള്‍ത്തടം തേവും "ഇന്നു"കള്‍!
നിങ്ങള്‍ക്കു രാത്രികളിവ തരുന്നെങ്കില്‍,
ഇവ മാത്രം തരുന്നെങ്കില്‍ ....
ഓര്‍ത്തു വച്ചോളൂ.....നിങ്ങള്‍ക്കീ ഉടുപ്പ്‌ തീരെ ചേരുന്നില്ല.!!!

എന്റെ നവോദയ!

2008-10-21T21:34:00.000-07:00

മഴമേഘങ്ങളെ കളിയാക്കി നടന്ന നാളുരിഞ്ഞു കളഞ്ഞു

മുതിരാന്‍ വെമ്പിയോര്‍ നമ്മള്‍......

നമുക്ക്‌ നഷ്ടമായത്‌ നമ്മെ മാത്രമല്ല,

നിറങ്ങള്‍ പൂത്തുനിന്നൊരു വസന്തം കൂടിയാണ്‌...

ഇത്ര നാള്‍ പാടിയതൊക്കെ വെറുതെ ആവുമ്പോലെ....

നാളെ നേരം വെളുക്കുമ്പോള്‍

ഈ ക്യാമ്പസിന്‌ ഞാനും ഒരു പരദേശിയാകും....പഴങ്കഥയാകും!!

നാമുതിര്‍ത്ത സൗഹ്രുദത്തിമിര്‍പ്പിനി ഓര്‍മ്മക്കെട്ടിലേക്ക്‌ പൊതിയണം..

അറിയാത്ത ലോകത്തിലേക്കിനി ഒരുങ്ങിയിറങ്ങേണം...ഒറ്റയ്ക്‌!!

പ്രിയരേ....അല്‍പ്പം തണുപ്പിലിനി തനിയെ നടക്കുമ്പോള്‍

ഊറിച്ചിരിക്കാനൊരു നുള്ള്‌ നന്മ ഞാനെടുക്കുന്നു....

എന്നെന്നും ഇങ്ങനെ ഓര്‍ത്തിരിക്കാന്‍....

നിഴല്‍പ്പാടില്‍ ഞാനെന്‍ ജീവിതം ഉടമ്പടി ചെയ്‌വൂ....

മറവി മൂടാത്ത നേത്രങ്ങളാല്‍ നിങ്ങള്‍ ചിരിക്ക..

മടക്കം

2008-10-20T09:25:00.000-07:00

കുറച്ചു നാളായി ഒന്നും എഴുതുന്നില്ല.
മനപൂര്‍വ്വമല്ല സുഹ്രുതെ....

സമയം വളരെ കുറഞ്ഞ തോതില്‍ പോലും
എനിക്കിപ്പോ അന്യമായിരിക്കുന്നു.

നിലയ്കാത്ത exams ,
അഭിനയത്തിന്റെ പല പല ഭാവങ്ങള്‍,
.....മടുത്തു തുടങ്ങി സുഹ്രുത്തേ...

ഞാന്‍ profileല്‍ എഴുതിയതു പോലെ
ഇതു വരെ student lifeന്റെ മുടിഞ്ഞ താള-ലയങ്ങളിലാരുന്നു

...now am Free....and will be..
i hope so!

എനിക്കിനിയെങ്കിലും അഭിനയം വേണ്ടാത്ത
ഈ കുഞ്ഞു വീട്ടിന്‍മുറ്റത്തൊന്നിരിക്കണം

....എന്റെ കൊതി തീരുവോളം!!!

എന്ടെ വിധി

2008-04-03T06:35:00.000-07:00

എന്റെ ഭാഷയില്‍ തുളകള്‍ വീണിരിക്കുന്നു.
ഞാന്‍ കക്കിയതൊക്കെ പുഴുത്ത മണം;
തുപ്പലൊഴുകിയതാകട്ടേ തിളച്ച വാക്ക്‌;
എന്നിലെ തണുപ്പ്‌ കൊഴിഞ്ഞു,
എന്റെ ശിശിരം കഴിഞ്ഞു!

വസന്തത്തിലിനി,യുറങ്ങാനാവില്ലെനിക്ക്‌
ചിരിക്കുക സോദരാ..ഞാന്‍ കാറിത്തുപ്പി.
ചാഞ്ഞു കിടന്നൂട്ടുക, മുലപ്പാലിറ്റുക സോദരീ
നിനക്കിത്‌ അവസാന ഗര്‍ഭം.
ചുഴികുത്തി,ക്കൊതി വാര്‍ന്ന
ജഠരത്തിനുള്ളിലായിരം പുഴു പൂത്തടര്‍ന്ന
തുളകള്‍!

എന്റെ ഭാഷ തുളഞ്ഞു പോയ്‌
പണ്ടാരങ്ങളെന്നെയടക്കി, തള്ളിക്കടന്നു,
ചാറ്‌ നോക്കി,ക്കഴുകന്മാരിത്ര കാലം ചിറഞ്ഞു..
എന്തിനീ നാഗരികത, യെന്തിനീ പുളച്ചില്‍?

ഒന്നും നേടിത്തരാത്ത വാക്കുകള്‍,
പഴമ തേടാത്ത വാക്കുകള്‍,
ജഠരാഗ്നി കാളും വാക്കുകള്‍,
മുലയൂട്ടാത്ത, പെറാത്ത പരട്ടവാക്കുകള്‍,
ചാവില്ലാത്ത കമാനങ്ങള്‍ വാക്കുകള്‍,
തിട്ടൂരമാകാത്ത വിലാപവാക്കുകള്‍,
കേള്‍ക്കുന്നോനെ വിഴുങ്ങുമീ മറുവാക്കുകള്‍,
അര്‍ഥങ്ങള്‍ തേറ്റ നീട്ടിയീ വാക്കുകള്‍,
കാണാമറയത്തിരുന്നിനിക്കുന്ന വാക്കുകള്‍,
ചിലച്ചു തീരിലും പുളിക്കുന്ന വാക്കുകള്‍,
എനിക്കൊപ്പമീ കുലം മുടിക്കും മരണവാക്കുകള്‍,
ചത്തു ചാകാത്ത മുത്തശ്ശനും വാക്കുകള്‍,
എത്ര പറഞ്ഞാലും തീരാതീ കിനാവള്ളികളെന്നെ
ചാഞ്ഞു വലിച്ചിഴച്ചേയിരിപ്പൂ.....

"അരുതേ"യെന്നലറുമ്പോളതു പോലുമറയ്ക്കുന്നു
വാക്ക്‌..വാക്കെന്നെ വിഴുങ്ങുന്നു, പനിക്കുന്നു,
എന്നെ നോക്കിച്ചിരിക്കുന്നു, മനമെന്നിലൂട-
കലേക്കോടി,യുഴറുന്നി,ത്ര കക്കീട്ടുമവിടവിടെ-
യുരുകി, ക്കുത്തലിതളായി വിടരുന്നു.

ചാകാന്‍ വയ്യാ..
കൊല്ലാനും വയ്യാ...വാക്കില്ലാതെനിക്കൊന്നിനും വയ്യാ
.എഴുത്ത്‌ മറക്കാനിറങ്ങി മനസ്സുടഞ്ഞോന്‍,
ഇനിമയ്ക്കായി ജന്മപ്പുതപ്പെറിഞ്ഞോന്‍,
പറിച്ചെറിഞ്ഞടുത്ത കടവത്തു നിന്നോരു
തോണിയെടുത്താലു,മൊഴുകിയെന്നെ,ത്തേടി
തുഴയുന്നീ അമ്മവാക്കുകള്‍!
അക്ഷരം പഠിപ്പിച്ചോനേ...നമോവാകം!

നീറുന്ന വാക്കിലഗ്നിയാളിച്ചെറിക,
പിഴച്ച പെണ്ണിന്നു,ദരമായ്‌ ചമയുക,
ചത്ത വേശ്യ തന്‍ മുലപ്പാലി,ലിനിക്ക,
തല്ലു കൊള്ളും കുട്ടിക്കിമ നീരാവുക,
പൊഴിഞ്ഞു പോം കതിര്‍ക്കുലയിലടരാവുക,
കടം കടിച്ച കര്‍ഷക,ന്റാതപമാക,
ചണനൂലു പൊട്ടി, വഴി തെറ്റുമീ യുവതയ്ക്കുദയമാക,
വാക്കേ......വാക്കേ
ഇതാണ്‌ ദൗത്യം,
ഇതേ പോര്‍ക്കളം,
ഇതാണ്‌ നിനക്കായ്‌ ഗുരുദക്ഷിണ
സായന്തനത്തിലീ നരച്ച ക്ലാസ്‌മുറിയി,ലമ്പരന്നീ
പുസ്തകമേട്ടിലൊരു പിടി മധുരം തിരയേ
ഞാനുമറിയുന്നൂ-
പറിച്ചെറിയാനാവില്ലീ ഭാരം.

ചാകാന്‍ വയ്യാ..
കൊല്ലാനും വയ്യാ...വാക്കില്ലാതെനിക്കൊന്നിനും വയ്യാ.

ഞങ്ങള്‍ മക്കള്‍!

2008-03-31T02:42:00.000-07:00

ഞങ്ങളിറങ്ങിപ്പോയ പകലുകളിലേക്കും
ആര്‍ക്കോ വേണ്ടി എണ്ണപ്പെട്ടതെന്ന്‌ കരുതിപ്പോയ തലയിണകളിലേക്കും
മഴ കറുംചായം കോരിയൊഴിച്ച വൈകുന്നേരം!
ആദ്യമായും അവസാനമായും
മഴത്തുള്ളികള്‍ ഞങ്ങള്‍ക്കു വേണ്ടി
ചിരിച്ചതപ്പോഴാകാം!
പാതിരാവണ്ടിക്കു കാത്തിരുന്നുറക്കം തൂങ്ങുന്നോരപ്പന്‍,
കത്തിയടര്‍ന്ന ചുള്ളിക്കുലയൂതുമമ്മ,
ചിത്രങ്ങള്‍ വക്കു പൊട്ടിയതെങ്കിലും മിഴിവൊടെ!
ഞങ്ങള്‍ 6 പേര്‍
മക്കളെന്ന പേര്‌ പേറിയോര്‍
പഠിച്ചതിലേറെ പാഠം ചൊല്ലിയോര്‍.
ഞങ്ങള്‍ക്കു വിട്ടു പോയത്‌
വെറുമൊരു വീടായിരുന്നില്ലായെന്നറിയും മുന്‍പെ
താഴ്‌വാരം നിശ്ബ്ദമായ്‌ പോയ്‌!
എത്ര കാലം കാത്തിരുന്നന്‍പോടെയീ,യമ്മ
നിലാവില്ലാത്ത നീലാകാശത്തിലെ നീലക്കടല്‍ നോക്കി
ഞങ്ങള്‍ ദൂരെ സൊറ പറഞ്ഞുറങ്ങിപ്പോയ്‌!
എത്ര പനിച്ചപ്പന്‍, ഉരുകി നടന്നു തീര്‍ത്തതീ
വഴിത്താര, ഞങ്ങളപ്പോളക്കരെ വെടിവട്ടം തീരാതെ
വിരസമായി ചിരിച്ചു കൊണ്ടിരുന്നേ പോയ്‌!

ഞാന്‍..
ഞങ്ങള്‍...
ഒരമ്മ പെറ്റ മക്കള്‍..
എന്തിനോ വേണ്ടി ഞങ്ങള്‍ മറുതലിച്ചു.
ലക്ഷ്യമില്ലാതെ ചണ്ടി പെറുക്കി..
.തുണനീരില്ലാത്ത പാഴ്ക്കിണര്‍ തേകി കശേരു പിഴച്ചോര്‍!
ഇന്നലെ ഞങ്ങള്‍ മടക്കയാത്ര നിര്‍ത്തി;
വീടെത്തിയാല്‍ പിന്നെന്തു ചെയ്യാന്‍?
ശൂന്യമായിപ്പോയ ഗര്‍ഭപാത്രവും താങ്ങി,
അടുക്കുകല്ലിറങ്ങി പോയവളുടെ ഗന്ധം!
തൂമ്പത്തഴമ്പിന്റെ കരം തൂങ്ങിയാടിയോരു
കഴുക്കോല്‍ത്തിണര്‍പ്പ്‌!
കൂട്ടിക്കുറച്ചിട്ടും ബാക്കിയാക്കുന്ന അനിയത്തിക്കൊഞ്ചല്‍!
ഒന്നു മാത്രം ബാക്കി..
വറ്റാക്കിണറൊന്നും പിന്നീ ഓട്ടത്തൊട്ടിയും!
പറയൂ...
ഇനി ഒന്നു പിണങ്ങാനാരുണ്ടു?
ഇറങ്ങിപ്പോകാനൊരു പകലുണ്ടോ?
ഞങ്ങള്‍ക്കു വിട്ടു പോയത്‌
വെറുമൊരു വീടായിരുന്നില്ലായെന്നറിയും മുന്‍പെ
താഴ്‌വാരം നിശ്ബ്ദമായ്‌ പോയ്‌!

വിഷാദിനി!

2008-03-31T02:07:00.000-07:00

ഞാനറിയാതെ എന്നെ സ്നേഹിച്ചൊരു ദീപനാളം
എന്റിമകളെ പഴുപ്പിച്ചുണക്കിയൊരു വിരല്‍ച്ചൂട്‌
എത്ര പറിച്ചെറിഞ്ഞാലും നനവിറ്റുന്ന ചിപ്പിയവള്‍
നമുക്കിടയില്‍ മൗനം കനപ്പിച്ചെടുത്തി,ട്ടവിടേ കോണി-
ലമൃതെന്നുരച്ചീ തൊണ്ടേ,ലരച്ചെപ്പിലൊരു നുള്ള്‌
വിഷം കോരിയ്യിട്ടോള്‍, വിഷാദിനി!

Nallaval

2007-09-25T23:51:00.000-07:00

നിന്റെ പുഴുത്തു ചീഞ്ഞ

ചലം നാറിയൊഴുകുന്ന സ്നേഹത്തെക്കുറിച്ചിനി

എന്നോട്‌ പറയാതിരിക്ക; കാരണം

പഴുത്തളിഞ്ഞ പഴങ്ങളില്‍ മരണ-

മുറങ്ങുന്നെന്നമ്മ പറഞ്ഞിട്ടുണ്ട്‌!

നിന്റെ കുത്തു വീണുരുകിയ പട്ടു വിതാനിച്ച

പുത്തന്‍ കോടിനിറങ്ങളിലെ പ്രണയത്തെക്കുറിച്ചിനി

എന്നോട്‌ കലഹിക്കാതിരിക്ക; കാരണം

കത്തിയടര്‍ന്ന തുണിക്കെട്ടിലും തക്ഷകനു-

ണര്‍ന്നിരിപ്പുണ്ടാകുമെന്നു ഞാനറിഞ്ഞിട്ടുണ്ട്‌!

ക്ലാവ്‌ പിടിച്ചഴുകിത്തുടങ്ങുമാ

പഴമ്പാക്കെട്ടിലെ പ്രാക്തനസ്വപ്നങ്ങളിനി

ഒരിക്കലൂടെ ഛര്‍ദ്ദിക്കാതിരിക്ക;കാരണം

തുരുമ്പു ജയിക്കാത്തിടത്തേ

ജീവനുയിര്‍വതുള്ളൂവെന്നു ബോധി ചൊന്നൂ!

നിന്റെയരിഞ്ഞു വീഴ്ത്തപ്പെട്ട ചിറകിലെ

ചാവുദോഷങ്ങളിലെ എന്റെ പങ്കിനെച്ചൊല്ലി

പുഴ ചിമറുമ്പോല്‍ കരയാതിരിക്ക;കാരണം

മഴയ്കു മുന്‍പേ മേഘം കീറപ്പെടേണ്ടുവെന്നും

ചിതറിയ ശകലങ്ങളില്‍ 'നാളെ' ഉയിര്‍ക്കുന്നെന്നും

നീയുമറിയേണ്ടിയിരിക്കുന്നു!

പച്ചക്കാട്ടിലെ, സ്ലേറ്റുപച്ചനനവിലെ

തുഷാരസ്വപ്നനിമിഷങ്ങള്‍ മറക്കാതിരിക്ക,

കാരണം ചീയുമ്പോഴും നെഞ്ചോടടുക്കി-

യുരുകാനെന്തു നീ തന്നെന്നു ചോദിക്കരുതല്ലോ!

ഓ...മറന്നൂ..

അതിനു ഞാനൊരു പുതുപ്പാവക്കുട്ടിയെ

തന്നല്ലോ, നിനക്കു കീറിയെറിയാനാകാഞ്ഞ

പച്ചക്കാട്ടിന്‍ മണമുള്ളോരു പാവക്കുട്ടിയെ!

തന്നതിനൊക്കെ നന്ദി..!

തിരിച്ചതു തന്നില്ലേലുമില്ല തെല്ലും കുഴപ്പം!

പാ ചുരുട്ടുമ്പോളേലുമോര്‍ക്കുക

എന്നെ നീയോമനേ..!!

അഭിനവഗന്ധര്‍വ്വ

2007-09-25T23:27:00.000-07:00

ഞാനിന്നലെ ചെറിയ ചെറിയ കാര്യങ്ങളില്
‍വല്ലാതെ നൊമ്പരപ്പെട്ടു;
ചീരത്തടത്തിലെ പുഴുക്കളെക്കുറിച്ചും,
ചെമ്പകത്തിലെ കറയൊലിപ്പിച്ചടര്‍ന്ന പൂമുറിവ്‌,
ചൈതന്യം കെടുത്തിയ തകരവിളക്ക്‌,
മഷിപ്പൊട്ടുണങ്ങാത്ത വിലാപസ്വരങ്ങള്‍,
അങ്ങനെയങ്ങനെ ചെറിയതെന്തൊക്കെയുണ്ടോ
അതിനെക്കുറിച്ചൊക്കെ!

അഭിനവഗന്ധര്‍വന്റെ റോളിലാണിവിടെ!
ഇന്നലെകള്‍ കൊഴിഞ്ഞുയിര്‍ വാര്‍ന്നു;
ഓജസ്സു കടം പേറിയൊരുപാട്‌, ഒരുപാട്‌,
'അഭിനവ'ഗാത്രങ്ങളെനിക്കു ചുറ്റും,എന്നെക്കടന്നും പൊയ്ക്കൊണ്ടേയിരിപ്പൂ!
'ഇന്നി'ലേക്കൂളിയിടാനുണര്‍ന്നതാണിപ്പോള്‍;
ഇഴ കൂടാതാരോ തറ്റിട്ട പരശതസ്വപ്നധവളിമ
എന്റെ തറികളിലിതാ ബാക്കിയാക്കി..

ചെയ്യാനൊത്തിരി, ചികയാനുമൊത്തിരി,
ചില്ലിട്ട ഫ്രെയിമുകളിലുയരത്തിലാ ചരിത്രമുറക്കം,
'ഇന്നലെ'കളിലെ വീരകേസരികളുടയത്ത
ചില്ലുകൂട്ടിലിരുന്ന്‌ മന്ദഹസിക്കുന്നു;
"ഞങ്ങളെല്ലാം ചെയ്തു തീര്‍ത്തിനി നിന്റെ ഊഴം
നിന്റെ കലപ്പ, നിന്റെ നൊമ്പരപ്പാട്ട്‌!"

ചെയ്യാനൊത്തിരി, ചികയാനൊത്തിരി,
ചികഞ്ഞിരുന്നാലിനി തീരില്ലാ വഴി തെല്ലും;
'ഇന്നലെ'കൊഴിഞ്ഞുയിര്‍ വാര്‍ന്നു;
'ഇന്നി'ലേക്കൂളിയിടാനുണര്‍ന്നതാണിപ്പോള്‍;
ഇനി എന്റെ കഥ, കലപ്പ,എന്റെ നൊമ്പരപ്പാട്ട്‌!

'നാളെ'കളില്‍ നീയും ഞാനും തനിച്ചാവാതിരിക്കണമെന്നുണ്ടെങ്കില്‍
'ഇന്നി'ന്റെ ചെറിയ ചെറിയ കാര്യങ്ങളില്
‍വെറുതെ, ചുമ്മാതെ നൊമ്പരപ്പെടുക!
ഓജസ്സു വാര്‍ന്നൊഴുകി, നിറം മങ്ങും
തിണ്ണ മേലുടഞ്ഞ വളപ്പൊട്ടു കണക്കമര്‍-
ന്നിരിപ്പാകുമ്പോള്‍,
ആര്‍ക്കും അവയെങ്കിലുമരികേ,
ചിരിച്ചുകൊണ്ടി"തെന്റെ ചരിത്രമായിരുന്നല്ലൊ"
എന്ന്‌!

അതു വരേയ്ക്കും അഭിനവഗന്ധര്‍വ്വനിയോഗം!!

ഒന്നു നോക്കണേ..Get-Together

2006-12-23T13:36:00.000-08:00

എന്റെ കൂട്ടുകാരെല്ലാം എത്തിയിരിക്കുന്നു.

വര്‍ഷങ്ങള്‍ക്കു ശേഷം ഞങ്ങള്‍ എല്ലാവരും ഒന്നു ഒരുമിക്കുന്നു.

ഈ വരുന്ന തിങ്കളാഴ്ച 26th December ..

പ്രിയപ്പെട്ടവരേ..ഞാന്‍ എത്ര കൊതിച്ചതാണെന്നോ ഈ കൂടിച്ചേരല്‍!

നിങ്ങള്‍ക്കും ഇങ്ങനെ ആഗ്രങ്ങളുണ്ടൊ?

എന്നെങ്കിലും, വര്‍ഷങ്ങള്‍ക്കു ശേഷം നിങ്ങള്‍ ഇതു പോലെ ഒരു get-togetherനു പോയിട്ടുണ്ടൊ? എങ്കില്‍ എന്തായിരുന്നു നിങ്ങളുടെ അനുഭവം?

ദയവായി എഴുതുക....

അറിയാനുള്ള ഒത്തിരി ആഗ്രഹത്തോടെ....

എന്റെ അനുഭവം ഞാന്‍ ഉടനെ പോസ്റ്റ്‌ ചെയ്യും..നിങ്ങളും ചെയ്യണേ....

ബലിച്ചോറുരുളകള്‍ക്ക്‌..

2006-12-23T13:31:00.000-08:00

വീണ്ടും ഞാന്‍ ഒന്നു മടങ്ങിപ്പോകുകയാണ്‌.
എന്നു വരുമെന്നു പറയുന്നില്ല;
അറിയില്ലാത്തതു കൊണ്ടാണെന്നു വച്ചോളൂ!

എന്റെ ജാതകം തേടുവാനിനിയെത്തുന്നോനോട്‌
അതു കടല്‍ വിഴുങ്ങിപ്പോയെന്നു പറയൂ!
എന്റെയല്ലാത്ത കഥാപ്പുസ്തകങ്ങളും പേറി,
നിഴലുകളെന്നെ,യെന്തു ചെയ്‌തെന്നാരായുവോന്‌,
"നെരൂദാക്കവിതകളുടെ" ഒരു കോപ്പി നല്‍കൂ!
നാളെ അവനും നിഴലിനെ പഠിച്ചേക്കാം.

പ്രിയപ്പെട്ട സഞ്ചാരീ,
ഓരോ നിഴല്‍ക്കൂത്ത്‌ കഴിയുമ്പൊഴും,
ചിത്രവധനാടകങ്ങള്‍ക്കു ശേഷവും ,
നിറനിലാവുകളുടെ വേഷപ്രശ്ചന്നങ്ങള്‍ക്കൊടുവിലും,
പിന്നെ,മരിക്കാതെ ജീവിക്കുന്ന ഒാരോ കൂട്ടുമുഖങ്ങള്‍ക്കു മുന്‍പിലും...
എനിക്കു വല്ലാതെ നോവുന്നു;
അതോ കുളിരുന്നോ???
എനിക്കൊട്ടും വയ്യാ...
ഇങ്ങനെ അഭിനയിച്ചു ചിരിച്ച്‌ഞാന്‍ മടുത്തു കൂട്ടുകാരാ........
എനിക്കിങ്ങനെ ഒരു മഴനിലാവ്‌..
ഇത്തരമൊരു നീലാകാശം..
അഴുക്കു നിറഞ്ഞു പതഞ്ഞ ഈ മണ്ണ്‌..
ആര്‍ത്തിപ്പണ്ടാരങ്ങളുടെ ക്രിസ്തുമസ്‌..
ശവക്കൂട്ടങ്ങളുടെ ഓണവെയില്‍...
ഒരിക്കലും എനിക്കു രുചിച്ചെടുക്കാനാവാത്ത,ആലിപ്പഴക്കൂട്ടങ്ങള്‍...
ഒടുവിലെവിടെയോ,എന്റെ പേരിലെഴുതപ്പെടും
അവസാനത്തെ "ആറടി" ഇടപാട്‌.
ഇതൊന്നും എനിക്കു വേണ്ടാ....

കഴിയുമെങ്കില്‍ എനിക്കു നീ ഒരല്‍പ്പംസമയം കടം തരുമോ?
അല്‍പ്പം കൂടി തീര്‍ക്കാനുണ്ട്‌;
ഞാനൊരല്‍പ്പം കൂടി തീരാനും....ദഹിച്ച്‌!

ഇനി ഒരു പുതുമഴയ്ക്കും ഞാനാം തകര,
ഉയരാതിരിക്കട്ടെ..
ഒരിക്കലുമിനി ഫീനിക്സുകളുയിര്‍ക്കാതിരിക്കട്ടേ,
നിലാവുകളിനി ഒരു താരത്തെയും പെറാതിരിക്കട്ടെ..
എന്തു കൊണ്ടെന്നാല്‍,ഇന്നിവിടെ എല്ലാം ഏറെയായിരിക്കുന്നു;
തകരകളും, താരങ്ങളും ഉന്നതികളിലെഫീനിക്സുകളും!!

പോകട്ടേ സഖേ, മഴ പെയ്തു തോര്‍ന്നു..
ഇനി വൈകുവാന്‍ ന്യായമില്ല..
തിരികെയെത്താന്‍ പാതയോരങ്ങളിലെഅടയാളക്കുറ്റികളുമില്ല...
തീരം എന്നെ വിളിക്കുന്നു..
അവസാനമായി ഒന്നു ചൊദിച്ചോട്ടേ,
എനിക്കു നീയെങ്കിലും കൂട്ടുകാരനായിരുന്നോ?
അക്ഷമ തിങ്ങിയ മിഴികളിലൊരായിര,മുത്തര-
-മൊളിപ്പിച്ചു നീ കഷ്ടപ്പെടേണ്ട..
എന്നെ അടക്കിയിട്ടു പ്രിയപ്പെട്ടവള്‍ക്കുമ്മ നേരാന്‍..!!
ഒത്തിരി വൈകി ..അല്ലേ!!

ശുഭയാത്ര..
പേരറിയാത്തീരങ്ങളിലേക്കുഊളിയിട്ടു പോയ സഞ്ചാരികള്‍ക്ക്‌!!

നിറനിലാവുകളുടെ ക്രിസ്തുമസ്‌

2006-12-07T09:57:00.000-08:00

കര്‍ണാടകയിലെ പുതുവര്‍ഷാരംഭത്തിന്‌ "ഉഗാദി"യെന്നാണു പേര്‍. IT boomingഉം multi-city adaptationഉം ഒക്കെയുണ്ടെങ്കിലും ഓരോ കന്നഡിഗനും ഇന്നും ഉള്ളിന്റെയുള്ളില്‍, കൈക്കോട്ടുമേന്തി വരമ്പത്തു നിന്നിറങ്ങുന്ന ആ പഴയ കര്‍ഷകനാണ്‌. അതിനാലാവണം, പുതുവര്‍ഷദിനത്തില്‍, എല്ലാ ഫലങ്ങളും അരച്ചു ചേര്‍ത്ത്‌ ഒരിനം നമുക്കവര്‍ കുടിക്കാന്‍ തരും. "സാംസ്കാരികദ്യുതി"യും "ഇന്‍ഡ്യയെ തൊട്ടറിയലും" ഒക്കെ ഉള്ളിലോര്‍ത്തു വാരി വലിച്ചു കുടിക്കാന്‍ ശ്രമിക്കുമ്പോള്‍ നാമറിയുന്നു, ഇതിനു മധുരമില്ലായെന്ന്!

അവിടെ തുടങ്ങുന്നു ശരാശരി മലയാളിയുടെ ഞെട്ടല്‍....എന്തേ മധുരിമയേറിയ ദിനത്തില്‍ വിളമ്പുന്നതിന്‌ മധുരമില്ലാത്തത്‌?

ഭാഷാഭേദങ്ങള്‍ക്കപ്പുറം ജിജ്ഞാസയേറുമ്പോള്‍ തല മുതിര്‍ന്നവരോട്‌ നാമാരാഞ്ഞെന്നു വയ്ക്കുക..നരച്ച പുരികങ്ങള്‍ മുകളിലേക്കുയര്‍ത്തി,സ്വതേ ചുളിഞ്ഞ നെറ്റിത്തടത്തില്‍ വീണ്ടുമായിരം ചുളിവുകള്‍ വീഴ്ത്തി അവരഭിമാനത്തോടെ പറയും "മധുരം നോക്കിയല്ല സാര്‍, ഞങ്ങളുടെ വിയര്‍പ്പിനെ നോക്കി ഒന്നു കൂടി പറയൂ.." ചോദിക്കാനുള്ള ചോദ്യങ്ങളത്രയും വെട്ടിമൂടി നാമതു പിന്നെ വലിച്ചു കുടിക്കും. കാരണം ആ മുഖങ്ങളില്‍ നാം കാണുന്നത്‌ ഏതോ കടപ്പാടോ ഔദാര്യമോ ദാനമോ,നല്‍കുമ്പോഴോ സ്വീകരിക്കുമ്പോഴോ ഉള്ള ഔദ്ധത്യമോ നിസ്സംഗതയോ അല്ല, പിന്നെയോ അവനുയിര്‍ കൊടുത്തും വേര്‍പ്പൊഴുക്കിയും ഇക്കഴിഞ്ഞ വത്സരം സൃഷ്ടിച്ചത്‌ എനിക്കു കൂടി(ഓര്‍ക്കുക! ഞാന്‍ വെറുമൊരു വരത്തന്‍!) പങ്കു വയ്ക്കുന്നതിന്റെ സന്തോഷമാണ്‌; അഭിമാനമാണ്‌.

ഇത്‌ ഡിസംബര്‍!!

നിലാവലകളുടെ താരാട്ടില്‍ പ്രകൃതി

പൂഴിയെപ്പോലും താലോലിച്ചുറക്കുന്ന രാത്രികള്‍!

ശിശിരക്കുളിരില്‍ ആയിരമായിരം കിളിനാദങ്ങള്‍

അനന്തതയില്‍ ഒഴുകി നീങ്ങും പ്രഭാതങ്ങള്‍!

എത്ര രസമാണെന്നു നോക്കുക...........

രാത്രിമഴകളിലെ മഞ്ഞു വീണു കുതിര്‍ന്ന പുല്‍പ്പടര്‍പ്പുകള്‍ കടന്ന്, തുഷാരത്തിരശീലകള്

‍മങ്ങി വിതുമ്പുന്ന ദേവാലയദീപങ്ങളെ നോക്കി

നടന്നു തീര്‍ത്ത എത്രയെത്ര പ്രഭാതങ്ങള്‍!

ഒത്തിരി തണുത്തു ചുരുങ്ങി ഒരു മരച്ചോട്ടിലെത്തുമ്പോളേതോ

സുഹൃത്താട്ടി വിട്ട ചില്ലകള്‍പൊഴിച്ച തുഷാരബിന്ദുക്കളില്

‍നാമൊക്കെ എത്രയേറെ തരളിതരായിട്ടുണ്ട്‌!!

പള്ളിമണികളും നക്ഷത്രവിളക്കുകളും കേക്കുകളും!

ഇന്നും ഡിസംബറിന്റെ icon presentations ആയി

ഇവയത്രെ നമുക്കുള്ളില്‍ ഉയിര്‍ കൊള്ളുന്നത്‌.

അവധിക്കൂട്ടങ്ങളും കരോള്‍ഗാനങ്ങളും

പിരിവിന്നൊടുവിലെ കൂട്ടയടിയും പിന്നെയെവിടെയോ

ആരോ വച്ചുണ്ടാക്കിത്തരുന്ന കപ്പപ്പുഴുക്കും ചൂടുകാപ്പിയും!!

ഒന്നും മറക്കാനാവുന്നില്ല; അല്ലെങ്കിലും ക്രിസ്തുമസ്‌ മറവിയുതല്ലല്ലൊ.....

അതെന്നും ഓര്‍മ്മക്കുറിപ്പുകളുടേതാണ്‌.

അല്‍പ്പം കൂടി വ്യക്തമാക്കിയാല്‍ ഡിസംബര്‍ വെറുമൊരു ഓര്‍മ്മക്കുറിപ്പ്‌ മാത്രമാണ്‌; ഇന്നീ യുഗത്തിലെങ്കിലും!

ഓര്‍മ്മക്കുറിപ്പുകളിലും, സ്‌മരണ പുതുക്കലിലും ക്രിസ്തുമസുടഞ്ഞു പോകുന്നുവോ?

വെറുതെ തലയാട്ടേണ്ടാ അനുവാചകാ,

നിര്‍മമതയുടെ മൂടുപടത്തിലൊളിപ്പിച്ചു വച്ചിരിക്കുന്ന സത്വത്തെ വലിച്ചൊന്നിറക്കിക്കേ,

ഈ നനുത്ത പകല്‍ വെളിച്ചത്തിലേക്ക്‌! അതല്‍പ്പമൊരു ചൂട്‌ കൊള്ളട്ടെ!

ഏറെ നാളായില്ലേ, ജീവിതസുരക്ഷയും, ആധുനികതയും, ജീവന കലയുമൊക്കെ പറഞ്ഞു നാമോരോരുത്തരും സ്വയം മൂടി വയ്‌ക്കാന്‍ തുടങ്ങിയിട്ട്‌!

എത്ര നാളായി മനസ്സറിഞ്ഞൊന്നു തണുത്തിട്ട്‌!

എന്നെ വായിക്കുന്നോരെ, ഓര്‍ത്തെടുക്കാനാവുന്നുണ്ടോ,

എന്നാണ്‌ ഏറ്റവുമവസാനം താങ്കള്‍ മനസ്സറിഞ്ഞൊന്നു കരഞ്ഞതെന്ന്‌!

കരയാന്‍ പോലും നാമിപ്പോള്‍ പേടിക്കുന്നു;

നാം നേടിയ അറിവുകള്‍ നമ്മെ കരയാന്‍ പോലുമനുവദിക്കുന്നില്ല.

ഇതു തന്നെയാണ്‌ നമ്മുടെ ഓരോ ക്രിസ്തുജനനത്തിലും സംഭവിക്കുന്നത്‌.

എത്രയെത്ര രാത്രിക്കുളിരുകളില്‍, നമ്മുടെ പള്ളിമുറികളില്‍ ആ പാതിരിമാര്‍ "ക്രിസ്തു ജനിച്ചു"വെന്നാര്‍ത്തു പാടി. നമ്മളിലെത്ര പേര്‍ക്ക്‌ തോന്നി അവന്‍ ജനിച്ചുവെന്ന്‌! (അവന്‍ ജനിച്ചിരുന്നോ എന്നു പോലും ഇഴ കീറി ചികയുന്ന ബാല്യങ്ങളുടെ നാട്ടില്‍, നമുക്കും വേണ്ടേ ഒരു ചോദ്യം എന്ന് അല്ലേ....) പാവം ക്രിസ്തു.. ഇന്നവന്‍ ജനിക്കുകയല്ലല്ലോ...ജനിപ്പിക്കുകയല്ലേ നമ്മള്‍!

ഓരോ ഡിസംബറും നമ്മുടെ നാഥയ്ക്കു സിസേറിയനാ! ഉള്ളഴിഞ്ഞുയിര്‍ തന്നു നാഥനെ ലോകത്തിനേകാന്‍ ഇറങ്ങിയവള്‍, വീര്‍ത്ത ഉദരവും താങ്ങി, എന്റെ പടിവാതില്‍ക്കലും എത്തി തിരികെപ്പോയിട്ടുണ്ടാവും! അറിഞ്ഞോ അറിയാതെയോ ആട്ടിയകറ്റിയിട്ട്‌ നാമോരോ ഡിസംബര്‍ 25 നും ഉണ്ണീശോയെ വിളിക്കും;"വാ...വന്നു പിറക്ക്‌!" ചലമടിഞ്ഞ മനക്കോട്ടകളില്‍, ജീവിതവ്യഗ്രതയുടെ ഹൃദയ ഇടനാഴികളില്‍, മോഹാര്‍ത്തി പൂണ്ട തലച്ചോര്‍ കൊട്ടാരങ്ങളില്‍ പിറക്കാനാവാതെ വിഷമിക്കുന്നവനെ, പിന്നെ നമ്മള്‍ പിറപ്പിക്കുകയായി. "സിസേറിയനാണേലും കുഴപ്പമില്ല; അമ്മയില്ലേലും കുഴപ്പമില്ലാ......അവനൊന്നു പിറന്നാല്‍ മതി!" എതിരേല്‍ക്കാനുള്ള കൊതിയല്ലിത്‌, അപ്പുറത്തെ വീട്ടിലവന്‍ പിറന്നെങ്കില്‍ ഇവിടെയുമവന്‍ പിറന്നേ തീരൂ.......ക്രൈസ്തവശാഠ്യം! പത്രോസുമാര്‍ ഇന്നും ജീവിച്ചിരിക്കുന്നു.

പിറന്നാലുമില്ലെങ്കിലും പട്ടുതുണിയിലൊരു മണ്‍കട്ട പൊതിഞ്ഞു തൊട്ടു വണങ്ങി നാമൊക്കെ അവന്റെ ഓര്‍മ്മ ആഘോഷിക്കും. അതേ..സ്‌മരണദിനം! നമുക്കെത്ര പേര്‍ക്കു ഗാന്ധിയോടു സ്‌നേഹം തോന്നിയിട്ടുണ്ട്‌ അദ്ദേഹത്തിന്റെ ജന്മദിനത്തില്‍? ഗാന്ധിജയന്തികള്‍ കലണ്ടര്‍ക്കോളങ്ങളിലെ ചുവപ്പുകട്ടകള്‍ മാത്രമാണല്ലോ? അതു പോലൊരു ഓര്‍മ്മയാണോ നമുക്കൊക്കെ ഇന്നു ക്രിസ്തുമസ്‌? ഡിസംബര്‍ 25 = ക്രിസ്തു ജനിച്ചു ; നമുക്കതു വേറൊരു അവധിദിനം മാത്രമായി പോകുന്നുവോ?

ക്രിസ്തുമസ്‌ ഇന്നു ഉത്‌സവങ്ങളുടെ ദിനമാണ്‌. മുമ്പ്‌ പറഞ്ഞതു പോലെ നക്ഷത്ര വിളക്കുകളും കരോള്‍ ഗാനങ്ങളും കേക്ക്‌ കഷണങ്ങളും! ജനിച്ചവനെയാരും തിരിച്ചറിയുന്നില്ലയോ? പലപ്പോഴും പിള്ളക്കച്ചയില്‍ 12 മണിക്ക്‌ പിറക്കുന്ന ഉണ്ണീശോ, പുലര്‍ച്ചകളില്‍ പൊട്ടിയ മദ്യക്കുപ്പികള്‍ക്കിടയില്‍, പേപ്പട്ടികള്‍ക്കിരയായി, മാംസപിണ്ഡമായി മാറിപ്പോകുന്നു. ഡിസംബറിന്റെ ശാപം അതൊരു ഓര്‍മ്മക്കുറിപ്പ്‌ മാത്രമാണെന്നുള്ളതത്രെ!

കന്നഡിഗനിലെ കര്‍ഷകനെ മറന്നുവോ?...മറക്കരുത്‌...

നാമോരോരുത്തര്‍ക്കുമായി വിലയേറിയതൊന്നു ചൊല്ലിത്തരുന്നുണ്ടവന്‍!

ക്രിസ്തു !! .............................നാഥനായും രാജാവായും എല്ലാത്തിനുമുടമയുമായി ഉന്നതികളില്‍ നിറക്കൂട്ടുകളില്‍ നാം കണ്ട ദൈവദര്‍ശനം! അപ്പത്തിന്റെ നിസ്സാരതയും, വീഞ്ഞിന്റെ പങ്കുവയ്കലും മറന്നിട്ടല്ലിതു പറയുക; എങ്കിലും മിക്കപ്പോഴും ക്രിസ്തു നമുക്കു രാജാവ്‌ മാത്രമായിപ്പോകുന്നു. ബഹുമാനപ്പെട്ട പ്രസിഡണ്ട്‌ അബ്‌ദുള്‍ കലാമും ഞാനുമായി എന്തു ബന്ധം? അദ്ദേഹം ഭരിക്കുന്നു; ഞാന്‍ ഭരിക്കപ്പെടുന്നു; അതിനും മുകളില്‍? ഒന്നുമില്ല, അദ്ദേഹത്തിനെന്തു പറ്റിയാലും എനിക്കൊന്നുമില്ല. കാരണം അദ്ദേഹം എന്റെയാരുമല്ലെന്നതു തന്നെ! ഇതാണോ എനിക്കും നിനക്കും ക്രിസ്തു? നമ്മുടെ കുറവുകളറിഞ്ഞവന്‍, നമുക്കും അവനുമിടയിലുണ്ടായേക്കാവുന്ന ഈ വഴിയകലവും മുന്‍പേ കണ്ടു. അതു കൊണ്ടാണല്ലോ , ഓരോ ക്രിസ്തുമസിലും അവനെന്നില്‍ വീണ്ടും ജനിക്കുന്നുവെന്ന സത്യം നിത്യഹരിതമായിരിക്കുന്നത്‌!! അവിടെ അവന്‍ എന്റേതാകുന്നു, ഉണ്ണീശോ എനിക്കുള്ളില്‍, എന്റെ ശുശ്രൂഷയ്ക്കായി, എന്റെ പരിലാളനയ്‌ക്കായി എന്നെക്കാത്തിരിക്കുന്നു. ബന്ധങ്ങളുടെ ഊഷരഭൂമികളില്‍ കാലയാപനം നടത്തുന്നവര്‍ക്കും പറയാം, "ഇതാ, എനിക്കും സ്‌നേഹിക്കാനൊരാള്‍" എന്ന്!

കര്‍ഷകനെപ്പോലെ, ഇക്കഴിഞ്ഞ നാളിലത്രയും അവന്‍ നമുക്കു പിറകെ അദ്ധ്വാനിച്ചു;വിയര്‍പ്പൊഴുക്കി. നമ്മളവന്‌ എത്ര ഗത്‌സമെനികളൊരുക്കി! പേപ്പട്ടിയെപ്പോലെ പുറകെയലഞ്ഞവന്‌ അവസാനം കണ്ടുമുട്ടുമ്പോള്‍ അഭിമാനത്തോടെ പകര്‍ന്നു നല്‍കാനുള്ളത്‌ മധുരമല്ല; സ്വര്‍ഗമാണ്‌....തന്നെത്തന്നെയാണവന്‍ എനിക്കു നല്‍കുക! അതു കൊണ്ടു തന്നെ ഓരോ ക്രിസ്തുമസും പങ്കുവയ്പിന്റേതാകുന്നു; ഇല്ലായ്‌മകളുടേതും ശൂന്യവല്‍ക്കരണത്തിന്റേതുമാകുന്നു.

ഇതത്രയും വായിച്ചു ചവച്ചു തുപ്പി പേജു മറിക്കുമ്പോള്‍ നിനക്കു കിട്ടുന്ന സംതൃപ്തിയിലൊരു മാത്ര ആ പരി.അമ്മയെക്കൂടി ഒന്നോര്‍ക്കുക. ഇപ്പറഞ്ഞതെല്ലാം ജീവിച്ചു കാണിച്ചതാണവള്‍! രക്ഷകനെയും രക്ഷയേയും ലോകത്തെയും ദൈവത്തിനൊപ്പം നോക്കി നടന്നു കണ്ടവള്‍! സഹരക്ഷകയ്‌ക്കപ്പുറം രക്ഷയുടെ ഓരോ ഘട്ടത്തിലും പുത്രന്‌ വഴികാട്ടിയായവളാണ്‌ അമ്മ. അല്ലെങ്കിലും ദൗത്യങ്ങള്‍ക്കു വഴി കാട്ടാനാണല്ലോ ഈ ലോകത്തിലെല്ലാ അമ്മമാരുടെയും വിധി!! എന്റെയും നിന്റെയും അമ്മയായവളെ, ഒന്നുമാഗ്രഹിക്കാതെ രക്ഷകന്റെ ജനനമധുരത്തിലും പേറ്റുനോവളന്നു തീര്‍ത്തവളെ, നമുക്കോര്‍ക്കാം. അവള്‍ക്കന്നും ഇന്നും ഡിസംബര്‍ വേദനയുടേതാണ്‌...പേറ്റുനോവിന്റേതാണ്‌. രക്ഷ പിറക്കുന്നതിന്റെ കൊടിയ വേദന! അതു കൊണ്ടു തന്നെ ഈ ക്രിസ്തുമസ്‌ സഹനങ്ങളുടേതുമാണ്‌.നമ്മുടെ വേദനകള്‍ക്കു നേരെ ഈ ഒരു മാസമെങ്കിലും വേദനാസംഹാരികള്‍ നമുക്ക്‌ തേടാതിരിക്കാം. ഒന്നു സഹിക്കാന്‍ പഠിച്ചു നോക്കാം നമുക്ക്‌! അമ്മയ്‌ക്കൊപ്പമാണിത്തവണ ഞാന്‍ എന്റെ രക്ഷകനെ സ്വീകരിക്കുന്നതെങ്കില്‍, ഇനി എന്റെ ഓരോ ജീവിതത്തുരുത്തിലും, അവളുമവനും എനിക്കു കൂട്ടായിരിക്കും! ഇതിലുമുപരിയായി എന്തു കൂട്ടാണു സോദരാ, നമുക്ക്‌ വേണ്ടത്‌?

ഹോ.......പള്ളിമണികള്‍ മുഴങ്ങിത്തുടങ്ങി..

വിളക്കുകളും തെളിഞ്ഞു...

പറഞ്ഞേറെ നേരം പോയി

നമുക്കുമവനെ സ്വീകരിക്കാന്‍ പോകാം..

ജനിപ്പിക്കാനല്ല,ഹൃദയത്തില്‍ അവന്‍ ജനിക്കാനായി...

കാത്തിരിപ്പിന്റെ നുറുങ്ങു വെട്ടവും പേറി..!!

കഴുതകളില്ലാതാകുന്നോ?

2006-12-06T10:03:00.000-08:00

സ്വര്‍ഗമെന്റെ കാലുകളെ പൊതിഞ്ഞൊഴുകി,
യവയെന്നേ വിണ്ടു കീറിയിരുന്നു!
ആളൊഴിഞ്ഞ പാനപാത്രങ്ങളിലൊന്ന്‌
ഇന്നും നിറഞ്ഞിട്ടില്ല.

ഒലീവു കൂട്ടങ്ങളി,ലരുമ ഗുരുവൊ-
രുമ്മ പോലും കൊതിക്കാതെയീ
ജനത്തിന്നായിരം മദ്ധ്യാഹ്‌നങ്ങളേകീ,
നീട്ടപ്പെടും തവ പാനപാത്രത്തിനും
ത്വല്‍ ചെഞ്ചുണ്ടിനു,മിടയിലിനിയാരുമില്ല.

ഒറ്റയ്‌ക്കോരിത്തിരി,ക്കയ്പു കൂടി,യിനി-
യവനിലെന്‍ കാപ്പയും കലപ്പയുമേകാന്‍!
ഓതി,യരുമയോടു"ലഞ്ഞു പോമെല്ലാരു-
മിടയനെ അടിക്കുമ്പോള്‍",വിനാഴിക-
യൊന്നേറും മുമ്പെ ചിതറിയ,വനൊപ്പം ഞാനും!

കഴുതജീനികളിലുയിര്‍ കൊടുത്തോരുണ്ട്‌.
കന്മതിലിലിരമ്പി,ക്കരഞ്ഞോരുമുണ്ടേറെ.
മിഴി മാന്തിക്കീറി മഞ്ഞു തിരഞ്ഞോര-
ധികാരി, ഉന്മത്ത വര്‍ഗവുമുണ്ട്‌.

ഇവരാണ്‌ കഥ..ഇവരാണു കലാകാരി-
വരാണു നിന്റെ കഥാപാത്രങ്ങളും!

കഴുത ആണുന്നതന്‍....
കുതിര വേഗമേറ്റുന്നൊ,രിക്കലും
പതിതന്റെ വേഗത്തിലോടാനാവതില്ല.
ഒട്ടകം അവനിയിലേറെ ഉയരേ ചരിപ്പൂ,
മണ്ണ്‌ തിന്നുന്നോനെ കേള്‍പ്പാനാവതില്ല.
കഴുത നടക്കുന്നവിരാമമൊരുകുഞ്ഞു ശാപവുമുരിയാടാതെ..
നിരത്തിലിഴയുന്നോര്‍ക്കൊപ്പ,മവരുടെ
വ്യാകുലപ്പതര്‍ച്ചകളിലിടറിയും
പൊള്ളിയും കൂടെ!

അത്ര തന്നെയവന്‍, യേശുവെന്നുള്ളോന്‍
അവനായിരുന്നുത്തമ കഴുത........

മൂന്നാവര്‍ത്തി

2006-12-06T09:59:00.000-08:00

-നീ - നിന്നാത്‌മാവ്‌ - ശരീരം.
പുഴയോളങ്ങളരുമയായ്‌ പാടിയ
നനുത്ത ഗീതങ്ങളിമ്പമായിത്ര കൂടിപ്പറഞ്ഞ-
തിന്നടിയിലൊരുപാടു ജീവനുടഞ്ഞിരിപ്പുണ്ടെന്ന്!

-സ്‌നേഹം - കാമം - ക്രോധം
നിന്റെ നിറനിലാവുകളെന്റെയാക്കവേ,
ഉള്ളിലെ "ഓംകാര"ങ്ങളെയൂറ്റി നീയാം ശംഖുടയ്കവെ,
അമ്പേറു ദൂരെയൊരു സെപ്റ്റംബര്‍ 11!

-മണ്ണ്‌ - മാനം - മിഴി
ചെറുചൂടിലീ മാരിക്കാറൊരു കുമ്പിള്‍ത്തണുപ്പാ-
യെത്തവെ, മനസ്സുറഞ്ഞു, മഴക്കാറിലന്തി-
ക്കടുപ്പു കൂട്ടാനില്ലാത്ത മിഴിനീരു കണ്ടു ഞാന്‍!

- ഞാന്‍ - ഞാന്‍ - ഞാന്
‍നിലാവു മരിക്കവേ, ചേതനകലകലവേ,
ചോദനയും ചാകവേ ...എന്തു ചെയ്യേണ്ടു,
എന്തു ചെയ്യേണ്ടു ഞാന്‍.?
പാവം..പാവം..പാവമീ ഞാന്‍!!

-പ്രലോഭനങ്ങളുടെ മൂന്നാവര്‍ത്തികളിനിയും
എന്നെക്കടന്നു പോയിട്ടില്ലല്ലോ!!

നൊമ്പരത്തോടെ ഞാനീ നേരുമിവിടെ വരയ്ക്കുന്നു...
സങ്കടക്കടലുകളില്‍,
പതിതഗത്‌സമെനികളില്‍,
വല്ലാതെ ഒറ്റപ്പെടുന്നവര്‍ക്കായി..!

http://public.fotki.com/felixwings/photography1

ഇത്‌ ഡിസംബര്‍!!

2006-12-05T14:07:00.000-08:00

നിലാവലകളുടെ താരാട്ടില്‍ പ്രകൃതി പൂഴിയെപ്പോലും
താലോലിച്ചുറക്കുന്ന രാത്രികള്‍!

ശിശിരക്കുളിരില്‍ ആയിരമായിരം കിളിനാദങ്ങള്‍
അനന്തതയില്‍ ഒഴുകി നീങ്ങും പ്രഭാതങ്ങള്‍!

എത്ര രസമാണെന്നു നോക്കുക...........

രാത്രിമഴകളിലെ മഞ്ഞു വീണു കുതിര്‍ന്ന പുല്‍പ്പടര്‍പ്പുകള്‍ കടന്ന്,
തുഷാരത്തിരശീലകള്‍മങ്ങി വിതുമ്പുന്ന ദേവാലയദീപങ്ങളെ നോക്കി
നടന്നു തീര്‍ത്ത എത്രയെത്ര പ്രഭാതങ്ങള്‍!

ഒത്തിരി തണുത്തു ചുരുങ്ങി ഒരു മരച്ചോട്ടിലെത്തുമ്പോളേതോ
സുഹൃത്താട്ടി വിട്ട ചില്ലകള്‍പൊഴിച്ച തുഷാരബിന്ദുക്കളില്
‍നാമൊക്കെ എത്രയേറെ തരളിതരായിട്ടുണ്ട്‌!!

പള്ളിമണികളും നക്ഷത്രവിളക്കുകളും കേക്കുകളും!
ഇന്നും ഡിസംബറിന്റെ icon presentations ആയി ഇവയത്രെ നമുക്കുള്ളില്‍ ഉയിര്‍ കൊള്ളുന്നത്‌.

അവധിക്കൂട്ടങ്ങളും കരോള്‍ഗാനങ്ങളും പിരിവിന്നൊടുവിലെ കൂട്ടയടിയും പിന്നെയെവിടെയോ ആരോ വച്ചുണ്ടാക്കിത്തരുന്ന കപ്പപ്പുഴുക്കും ചൂടുകാപ്പിയും!!ഒന്നും മറക്കാനാവുന്നില്ല; അല്ലെങ്കിലും ക്രിസ്തുമസ്‌ മറവിയുതല്ലല്ലൊ.....

http://fotki.com/felixwings

വീണ്ടും?

2006-12-01T21:57:00.001-08:00

ഒരാള്‍ വാതിലില്‍ ഒരു മുട്ടു കേട്ടു.
നോക്കിയപ്പോള്‍ ഒരു ഒച്ച്‌.!
കലി വന്നിട്ടയാ,ളതിനെ ദൂരേക്കു
വലിച്ചെറിഞ്ഞു.

ആറു വര്‍ഷങ്ങള്‍ക്കു ശേഷം
വാതിലില്‍ വീണ്ടുമൊരു മുട്ട്‌...
നോക്കിയപ്പോളോ ..ആ പഴയ ഒച്ച്‌!

"നിനക്കെന്തിന്റെ കുഴപ്പമാണ്‌?"
അയാള്‍ ചോദിച്ചു.

ഒച്ച്‌ ക്ഷോഭത്തോടെ പറഞ്ഞു,
"ആറു വര്‍ഷങ്ങള്‍ക്കു മുന്‍പെന്തിനാണു
നിങ്ങള്‍ എന്നെ എടുത്തെറിഞ്ഞത്‌?"

അതു ചോദിക്കാന്‍ ആറു വര്‍ഷം നീണ്ട യാത്ര!!!

കള

2006-12-01T21:56:00.001-08:00

കളയാനുള്ളതത്രേ കള,
കരയാനുള്ളവരത്രേ കള.

പറിച്ചു മാറ്റേണ്ടത്‌, പുകച്ചിറക്കേണ്ടത്‌,
പിണമാവെണ്ടത്‌, നീറി നാറേണ്ടത്‌
ചീഞ്ഞു ചുടലയ്ക്കു കൂട്ടു പോവേണ്ടത്‌..
ഇതൊക്കെയത്രെ കള.!!

കരങ്ങള്‍ക്കൂറ്റമേറവേ, കറ്റ കെട്ടി
കളം കാലിയാക്കാനവരാര്‍ക്കെ,
പുത്തന്‍ തലപ്പാവുമേന്തി നില്‍ക്കുമാ
മച്ചമ്പിയൊന്നു ചൊല്‍കീ പാണന്റെ
പാഴ്മനക്കോണിലെ "ശംശയം"!

ഏതാണു കള?

ചീര നട്ടിടത്തു നെല്ലെങ്കിലതു കള,
നെല്ലിട്ടിടത്തു ചീരയെങ്കിലതും കള.

നേരം നന്നാവതെ നില തേടിയോര്‍..
ഒരിത്തിരി വൈകി ഫലമേകുവോര്‍..
ചാര്‍ട്ടുക,ലിലഞ്ചക്കമേകുവതില്ലാത്തോര്‍...
ഇവരാണോ കള?????????
തമ്പ്രാ..തലകളില്‍ കൊടിക്കൂറക-
ളില്ലെങ്കിലീ പാവ,മ്പാണനുമൊരു കള.!

ചങ്കു വേവുമ്പോ,ളടിയനിടറിപ്പറയുന്നൂ,
"ഒരേയൊരു സത്യമേയുള്ളൂ..ഒരു സത്യവുമില്ലായെന്ന്!"
വരമ്പത്തിരിപ്പോരെ, തലപ്പാവുള്ളോരെ,
നിങ്ങളാണവര്‍, കള-വിളകളെ വേര്‍ത്തിരിപ്പോര്‍!

പിന്നെ കളം നിശബ്ദമായി..എന്നത്തേയും പോലെ.

മഞ്ഞു വീഴും മുമ്പെ കറ്റ കെട്ടിത്തീര്‍ത്ത
ചിരുതയാ പാണന്നുടുക്കു ഒളിച്ചെടുത്തു;
ചോര പുരളാതെ!!!!!!

ബലിയാകാത്ത കുഞ്ഞാട്‌

2006-12-01T21:54:00.000-08:00

നീട്ടി നിറകുമ്പിളൂര്‍ത്തിയാ
നാണയക്കൂമ്പാരങ്ങളെ വിലയായി,
വീണ്ടുമൊരു ജീവനായി,
നിറവിന്റെ നനവൊത്ത മെത്തയായ്‌,
ചേര്‍ത്തു ഞാനേന്തിയൊരു കുഞ്ഞാടിനെ
തിരുദേവാലയ മുറ്റങ്ങളില്‍ നിന്നും!!

കാതങ്ങള്‍ക്കകലേക്കു കാലടി വച്ചതും,
എതിര്‍ദിശയിലാര്‍ത്തനായി പാഞ്ഞതും,
നിനക്കല്ലൊ.....നിനക്കായല്ലോ കുഞ്ഞേ.....
ഒരു കുഞ്ഞെങ്കിലുമീ,യര്‍ഥശൂന്യമാം,
ദേവാലയദഹനങ്ങളില്‍ നിന്നു രക്ഷയാവാന്‍!!

കുരിശേന്തി ഞാനേകി രക്ഷ..
ലോകമെന്നിട്ടുമെന്തിനു നിന്നെയറുക്കുന്നുവോ?
ദൈവമെന്ന കൂട്ടിലെന്നെ അടച്ചവരെവിടോ
വിരുന്നു പോകുന്നു...മാനസാന്തരപ്പെടുന്നു!
മഴക്കാടുകളിലായിരം കുളം കുഴിച്ചേറെ,
ചേറൂറ്റി സഭാഗാനം പാടുന്നു...ചലം ചുമക്കുവോര്‍!!

ഈ ഒരു കുഞ്ഞാടെങ്കിലും ബലിയാവാതിരിക്കട്ടെ..
മടങ്ങുക കുഞ്ഞേ..മലഞ്ചെരിവുകളിലേക്ക്‌..
ഞാനും മടങ്ങുന്നു
ദൈവക്കൂട്ടിലേക്കും...അല്ലാതെന്ത്‌?

അനന്തത - അസംഖ്യത - നിസ്സാരത

2006-12-01T21:53:00.000-08:00

ഇവിടെ ഒരു മരുഭൂമി.........അനന്തത!
അവിടെയൊരു നാടോടിക്കൂട്ടം......അസംഖ്യത!
അവര്‍ക്കൊരു കോപ്പ വെള്ളം...നിസ്സാരത!

അവര്‍ക്കൊരിക്കലൊരു വഴിതെറ്റല്‍....നിശ്ചലത!
അവരിലേക്കോരൊ പകല്‍ച്ചൂടും......നിസ്സംഗത!

ഒരു മരണഗാനം തുടങ്ങുന്നു,
ഇനിയെന്തുണ്ടാവാം?

ക്ഷാത്രവീര്യം കഠാരത്തുമ്പുകളില്‍
ചോര നിറച്ചൊടുവിലൊരുവനാ
കോപ്പയേന്തുന്നു...കടക്കുന്നു മരുഭൂമി!
ഒരുവന്‍ മാത്രം...വീണ്ടും നിസ്സാരത!!

മറ്റൊന്ന്............

രാത്രിക്കു തിന്നാനാ,ക്കൂട്ടരൊന്നാകെ,
പിണക്കൂട്ടങ്ങളായി പിറക്കേ,യാക്കോപ്പ-
യിലതു പടി ശേഷിപ്പൂ ജലം...!
മരണം മുറിച്ചു കടന്നിരിക്കുന്നു, എല്ലാവരിലേക്കും!
കൂട്ടമൊന്നാകെ............വീണ്ടും അസംഖ്യത!!

ഒറ്റിക്കൊടുക്കപ്പെട്ടവന്റെ കൃതജ്ഞതാഗീതം

2006-12-01T13:48:00.000-08:00

ധീരമാം സ്നേഹമേ ശാന്തി.....
ആരറിഞ്ഞീ വഴിയിലൊടുവിലത്തെ
യാത്രക്കാരനാണെന്ന്!ആരറിഞ്ഞീ വിളമ്പുന്ന അത്താഴം
ഒടുവിലത്തേതല്ലെന്ന്!

താന്‍ തീര്‍ത്ത വറചട്ടിയില്‍ വീണ്‌
തനിയെ പുകഞ്ഞവന്‍...
നാള്‍വഴിയിലിവനിന്നു നാമമില്ല.
നാട്ടുവഴിയിലീ മുഖമോര്‍മ്മയില്ല.
എന്നാലുമെന്‍ നിലവിളിക്കിടയിലെ
കണ്ണീരിലൂറുന്നു മനുജന്‍!!

ഊട്ടിയില്ലെ ഞാനാം വിരുന്നു നിന്നെ
നിന്‍ നിറമിഴികള്‍ ചത്വരലോകം തുറക്കെ..
നിറച്ചുണ്ടിട്ടുമാര്‍ക്കോ വേണ്ടി മല താണ്ടിട്ടും
കളപ്പുരയേറെ നിറച്ചിട്ടുമെന്തേ ജീവനകന്നു പോയ്‌?
എന്തിനേന്തി നീ കരയാനനുവദിക്കാ ജ്ഞാനം?

കാലിത്തൊഴുത്തില്‍ പിറന്നവന്‍
അമരങ്ങളന്തിക്കണിയറയാക്കിയോന്‍കു
രിശോടു ചേര്‍ത്തറുക്കപ്പെട്ടവനൊ-
രുവനെക്കുറിച്ചു പറയാന്‍
പൊന്നു പാകുമോരള്‍ത്താര തീര്‍പ്പുവോ നീ?

എന്നെയല്ലോ ചുട്ടു കൊല്ലുന്നിവര്‍, നിത്യമെ-
ന്നെയല്ലോ ചില്ലിലിട്ടു വില്‍ക്കുന്നിവര്‍!

എല്ലാ ഓടകളുമെന്നിലേക്ക്‌..
ഞാനോ അസ്തമയ സമുദ്രത്തിലേക്ക്‌..
എന്റെ ഹിതങ്ങള്‍ക്കു കുറുകെ
മാറ്റാന്റെ ഹിതം തറച്ചതീ കുരിശ്‌!
മണ്ണു നാറുമതിന്നാലെറിയുക കുറ്റമേന്തുന്നോനെ
മരക്കൂട്ടിലന്തിക്കുംഭൂമിക്കും മദ്ധ്യെ ........അതുമീ കുരിശ്‌!!
ചിതയ്ക്കരികെ തീ കായുവോരേ, ചിത
ആഹരിപ്പതൊരു ജീവന,തിനു ശവമെന്നു പേരെങ്കിലും!
നന്ദി ചൊല്‍വൂ വെണ്‍കുടിരങ്ങളേ,
അല്‍പ്പനീത്തെണ്ടി,ക്കുടലിലീ ജന്മപരിഹാര-
ബലിക്കല്ലിലൊരു ദഹനബലി കൂടി നേരാന്‍..

അന്തിക്കും ഭൂമിക്കുമിടയിലൊരു ബലിക്കല്ല്!!

ഉപ്പ്

2006-11-26T00:01:00.000-08:00

ഭക്ഷണത്തില്‍ ഉപ്പിന്റെ അളവു കുറയ്ക്കാന്‍ നിര്‍ദേശിച്ച ഡോക്ടറോട്‌ , കണ്ണുനീരില്‍ ഉപ്പിന്റെ അളവു കുറക്കാന്‍ എന്തെങ്കിലും മാര്‍ഗം ഉണ്ടൊയെന്നു വൃദ്ധ തിരിച്ചു ചോദിച്ചു.താന്‍ പഠിച്ചെടുത്ത മെഡിക്കല്‍ റ്റേംസിലൊന്നും അതിനു പ്രതിവിധി നിര്‍ദേശിച്ചിട്ടില്ലല്ലൊ എന്നയാള്‍ സങ്കടത്തോടെ ഒാര്‍ക്കവെ, ഒത്തിരി ചോദ്യങ്ങള്‍ ഒറ്റക്കു ചോദിച്ചിട്ടുള്ളവള്‍ ജീവിതത്തിന്റെ കോമാളിക്കൂട്ടങ്ങളിലേക്കു മുഖം തിരിച്ചു കഴിഞ്ഞിരുന്നു...ആരോടും പരിഭവങ്ങളില്ലാതെ.....

പുരോഗതി

2006-11-25T23:57:00.000-08:00

ഗോപാലനും പൈലിയും രാരിച്ചനും രവിയും അയല്‍ക്കാരണ്‍്‌. ഒരുമിച്ചു കളിച്ചു വളര്‍ന്നു. അച്ഛനപ്പൂപ്പന്മാരെല്ലാം പാടത്തും പറമ്പിലും കൃഷിപ്പണി ചെയ്തു കഴിഞ്ഞവരാണു. മക്കളെ പഠിപ്പിച്ചു കേമന്മാരാക്കണം എന്നു അവരാഗ്രഹിച്ചു. നാലു പേരും എസ്‌.എസ്‌.എല്‍.സി പാസായി. തുടര്‍ന്നു പഠിക്കണമെങ്കില്‍ സിറ്റിയില്‍ പോകണം.

അങ്ങനെ ഇരിക്കെ തൊട്ടടുത്തു കോളേജു വന്നു.

നാലു പേരും ചേര്‍ന്നു.
ഒരാള്‍ ഒരു വര്‍ഷം പോയി. നിര്‍ത്തി.

മറ്റു മൂന്നു പേരില്‍ രണ്ടു പേര്‍ ഇന്റര്‍മീഡിയറ്റില്‍ മൂന്നു കൊല്ലം തോറ്റു. പിന്‍ വാങ്ങി.

ഒരാല്‍ ബി.എ ആയി.

അപ്പോളാണു പ്രശ്നം ആരംഭിച്ചത്‌. വിദ്യാസമ്പന്നന്മാര്‍ അച്ഛന്മാരുടെ പണിക്കു പറ്റിയവരല്ല.

അന്തിക്കു നാലു പേരും ഒത്തുകൂടും: നാലാം നമ്പര്‍ ഷാപ്പില്‍. അതൊരു ആശ്വാസമാണു. തൊട്ടടുത്തു ബോട്ടുചാലാണു. കടത്തു വള്ളവുമുണ്ട്‌. നാലു പേരും വള്ളത്തില്‍ കയറി തുഴയാനാരംഭിക്കും. മുന്നോട്ട്‌...മുന്നോട്ട്‌...മുന്നോട്ട്‌...

നിര്‍ത്താതെ തുഴഞ്ഞു ക്ഷീണിക്കും. നേരവും വെളുക്കും. എന്തതിശയം! വള്ളം കടവില്‍ തന്നെ കിടക്കുന്നു! നാലു പേരും മുഖത്തോടു മുഖം നോക്കി, പൊട്ടിച്ചിരിച്ചു. വള്ളത്തിന്റെ കെട്ടഴിച്ചില്ല. കെട്ടിയിടത്തു കിടന്നു കുലുങ്ങുകയായിരുന്നു വള്ളം!!

സ്വതന്ത്ര ഭാരതത്തില്‍ വന്ന ശ്രദ്ധേയമായ മാറ്റം കുഞ്ഞിക്കൂരകളുടെ സ്ഥാനത്ത്‌ മണിമാളികകള്‍ ഉണ്ടായി എന്നത്രെ!

സായിപ്പു കെട്ടിയ കെട്ട്‌ ഒന്നു കൂടി മുറുകി! അത്ര മാത്രം!

എല്ലാ രംഗങ്ങളും നില്‍ക്കുന്നിടത്തു നിന്നു വട്ടം ചുറ്റുന്നു.മനസ്സിന്റെ കെട്ടു പൊട്ടുന്നില്ല.....കൂടുതല്‍ പിരി മുറുകുന്നു താനും!

സൂപ്പര്‍ സ്പെഷ്യാലിറ്റി ഹോസ്പിറ്റലുകളുടെ നല്ല കാലം .....!

എന്നെ കൂടി ഒന്നു നോക്കണേ......

2006-11-24T20:56:00.000-08:00

എന്റെ പേരു ഫെലിക്സ്. ഞാന്‍ നമ്മുടെ മലയാളം ബ്ലോഗ് സമൂഹത്തില്‍ പ്രവേശിച്ചിട്ടുള്ളത് ഒന്നറിയിച്ചിട്ടു പോകാം എന്നു വിചാരിച്ചു കയറിയതാ....

മഴ നനയാത്തവര്‍ക്കായി

2006-11-24T20:45:00.000-08:00

മഴ നനയാത്തവര്‍ക്കായി
എന്റെ മാത്രമായിരുന്നവള്‍ക്കു,
മരണം പെയ്തു തോര്‍ന്ന ഈ വഴിത്താരകളുടെ ഇടയിലൂടെ ഞാനും!!
നിഴലിനും വഴി തെറ്റിയ പറവക്കൂട്ടങ്ങള്‍ക്കും ഇടയില്‍
എന്റെ മാത്രം നേര്‍വഴിക്കു എന്തു പ്രസക്തി?

കറുപ്പു വറ്റി ഉണങ്ങിയ കണ്ണുകളില്
‍കാലത്തിന്റെ കലര്‍പ്പുകളും പേറി ഇനി ഇങ്ങനെ എത്ര നാള്‍ കൂടി?
മഞ്ഞപ്പു വീണ തെരുവോരങ്ങള്‍ ആരെയും അറിയാറില്ല .
നിലാവിനു എന്നെയും !!
അറിഞ്ഞു പോയല്ലോ ഞാന്‍ നിന്നെയും;നിലാവിനേയും.

"ഞാന്‍ മഴയില്‍ നടക്കാന്‍ ഇഷ്ടപെടുന്നു;
അവിടെ എന്റെ കണ്ണീര്‍ തുള്ളികള്‍ ആരും കാണുന്നില്ലാത്തതിനാല്‍!"
എവിടെയൊ കേട്ടതു ശരി തന്നെ.....

നിന്റെ മര്‍മ്മരങ്ങള്‍ക്കു ചെവിയോര്‍ക്കാന്‍
നിന്റെ വീണാനാദത്തിനു മിഴിയിളക്കാന്
‍നിന്നോടൊപ്പം നിളാതീരങ്ങളില്‍ നനവു പടര്‍ത്താന്
‍നാടോടിക്കൂട്ടങ്ങളില്‍ നിശാഗീതം പാടാന്‍ ഇനി ഞാനില്ല.............

മുങ്ങും മുന്‍പെ എന്നൊ കപ്പിത്താന്‍ കുറിച്ച
നാള്‍വഴികളില്‍ നാം ഒരിക്കല്‍ വായിച്ചതോര്‍ക്കുന്നുവോ?
"എന്റെ ജാതകം കടലെടുക്കുമ്പോള്‍
തീരം എന്നെ കുറിച്ചു പാടും.
എത്തിച്ചേരാത്ത രാജയോഗങ്ങളും
കാത്തിരിക്കുന്ന ഭാഗ്യനക്ഷത്രങ്ങളും
ഈ നൊടിയിലെ സാഗരഭാരം അളന്നില്ല.
മടങ്ങിവരവില്ലാത്ത യാത്രാമൊഴിക്കു വേര്‍പാട്‌ എന്നല്ല പേര്
‍വിട വാങ്ങല്‍ എന്നത്രേ......"

നീട്ടുന്നില്ല സഖീ...വിട പറയുന്നു
ഇനിയും ആ തീരത്തെ മഴക്കുളിരില്
‍ചിപ്പികള്‍ പിറക്കട്ടെ........